apni malka-e-suKHan se

ai sham-e-'josh' o mash.al-e-aivān-e-ārzū

ai mehr-e-nāz o māh-e-shabistān-e-ārzū

ai jān-e-dard-mandī o īmān-e-ārzū

ai sham-e-tūr o yūsuf-e-kan.ān-e-ārzū

zarre ko āftāb to kāñTe ko phuul kar

ai rūh-e-sher sajda-e-shā.ir qubūl kar

dariyā kā moḌ naġhma-e-shīrīñ kā zer-o-bam

chādar shab-e-nujūm kī shabnam kā raḳht-e-nam

titlī kā nāz-e-raqs ġhazāla kā husn-e-ram

motī kī aab gul kī mahak māh-e-nau kā ḳham

in sab ke imtizāj se paidā huī hai tū

kitne hasīñ ufuq se huvaidā huī hai tū

hotā hai mah-vashoñ kā vo aalam tire huzūr

jaise charāġh-e-murdā sar-e-bazm-e-sham-e-tūr

aa kar tirī janāb meñ ai kār-sāz-e-nūr

palkoñ meñ muñh chhupāte haiñ jheñpe hue ġhurūr

aatī hai ek lahr sī chehroñ par aah kī

āñkhoñ meñ chhūT jaatī haiñ nabzeñ nigāh kī

raftār hai ki chāñdnī rātoñ meñ mauj-e-gañg

yā bhairvīñ kī pichhle pahar qalb meñ umang

ye kākuloñ kī taab hai ye ārizoñ kā rang

jis tarah jhuTpuTe meñ shab-o-roz kī tarañg

rū-e-mubīñ na gesū-e-sumbul-qavām hai

vo barhaman kī sub.h ye saaqī kī shaam hai

āvāz meñ ye ras ye latāfat ye iztirār

jaise subuk mahīn ravāñ reshmī phuvār

lahje meñ ye khaTak hai ki hai neshtar kī dhaar

aur gir rahā hai dhaar se shabnam kā ābshār

chahkī jo tū chaman meñ havā.eñ mahak ga.iiñ

gul-barg-e-tar se os kī būñdeñ Tapak ga.iiñ

jaadū hai terī saut kā gul par hazār par

jaise nasīm-e-sub.h kī rau jū-e-bār par

nāḳhun kisī nigār kā chāñdī ke taar par

mizrāb-e-aks-e-qaus rag-e-ābshār par

maujeñ sabā kī baaġh pe sahbā chhiḌak ga.iiñ

jumbish huī laboñ ko to kaliyāñ chaTak ga.iiñ

chashm-e-siyāh meñ vo talātum hai nuur kā

jaise sharāb-e-nāb meñ jauhar surūr kā

yā chahchahoñ ke vaqt tamavvuj tuyūr kā

bāñdhe hue nishāna koī jaise duur kā

har mauj-e-ra.g-e-qāmat-e-gul-rez ram meñ hai

goyā sharāb-e-tund bilorīñ qalam meñ hai

tujh se nazar milā.e ye kis kī bhalā majāl

tere qadam kā naqsh hasīnoñ ke ḳhadd-o-ḳhāl

allāh re tere husn-e-malak-soz kā jalāl

jab dekhtī haiñ ḳhuld se hūreñ tirā jamāl

partav se tere chehra-e-parvīñ-sarisht ke

ghabrā ke band kartī haiñ ġhurfe bahisht ke

chehre ko rang-o-nūr kā tūfāñ kiye hue

sham-o-sharāb-o-sh.er kā unvāñ kiye hue

har naqsh-e-pā ko tāj-e-gulistāñ kiye hue

sau tuur ik nigāh meñ pinhāñ kiye hue

aatī hai tū chaman meñ jab is tarz-o-taur se

gul dekhte haiñ baaġh meñ bulbul ko ġhaur se

mere bayāñ meñ sehr-bayānī tujhī se hai

rū-e-suḳhan pe ḳhūn-e-javānī tujhī se hai

lafzoñ meñ raqs-o-rañg-o-ravānī tujhī se hai

faqr-e-gadā meñ farr-e-kiyānī tujhī se hai

fidvī ke is uruuj pe kartī hai ġhaur kyā

terī hī jūtiyoñ kā tasadduq hai aur kyā

ai kirdgār-e-mā'nī o ḳhallāq-e-sher-e-tar

ai jān-e-zauq o muhsina-e-lailī-e-hunar

khul jaa.e gar ye baat ki urdu zabān par

terī nigāh-e-nāz kā ehsāñ hai kis qadar

chāroñ taraf se na.ara-e-salle-alā uThe

tere mujassamoñ se zamīñ jagmagā uThe

mere hunar meñ sarf huī hai tirī nazar

ḳhema hai mere naam kā bālā-e-bahr-o-bar

shohrat kī bazm tujh se munavvar nahīñ magar

farq-e-gadā pe taaj hai sultāñ barahna-sar

parvāne ko vo kaun hai jo māntā nahīñ

aur sham.a kis taraf hai koī jāntā nahīñ

dil terī bazm-e-nāz meñ jab se hai bāryāb

har ḳhaar ek gul hai to har zarra āftāb

ik lashkar-e-nashāt hai har ġham ke ham-rikāb

zer-e-nagīñ hai ālam-e-tāmkīn-o-iztirāb

bād-e-murād o chashmak-e-tūfāñ liye hue

huuñ bū-e-zulf-o-jumbish-e-mizhgāñ liye hue

tere laboñ se chashma-e-haivāñ mirā kalām

terī laToñ se mauja-e-tūfāñ mirā kalām

terī nazar se tūr-e-ba-dāmāñ mirā kalām

tere suḳhan se naġhma-e-yazdāñ mirā kalām

tū hai payām-e-ālam-e-bālā mire liye

ik vahī-e-zī-hayāt hai goyā mire liye

ai māh-e-she.r-parvar o mehr-e-suḳhan-varī

ai āb-o-rañg-e-'hāfiz' o ai husn-e-'anvarī'

tū ne hī sabt kī hai ba-sad nāz-e-dāvarī

mere suḳhan kī pusht pe mohr-e-payambarī

terī shamīm-e-zulf kī daulat liye hue

merā nafas hai bū-e-risālat liye hue

dur-hā-e-āb-dār o sharar-hā-e-dil-nashīñ

shab-hā-e-talḳh-o-tursh o sahar-hā-e-shakkarīñ

aql-e-nashāt-ḳhez o junūn-e-ġham-āfrīñ

daulat vo kaun hai jo mirī jeb meñ nahīñ

Takrā.ī jab bhī mujh se ḳhajil sarvarī huī

yuuñ hai tire faqīr kī jholī bharī huī

naġhme pale haiñ daulat-e-guftār se tirī

paayā hai nutq chashm-e-suḳhan-bār se tirī

tāqat hai dil meñ nargis-e-bīmār se tirī

kyā kyā milā hai 'josh' ko sarkār se tirī

bāñke ḳhayāl haiñ ḳham-e-gardan liye hue

har sher kī kalā.ī hai kañgan liye hue

ai lailī-e-nahufta o ai husn-e-sharmagīñ

tujh par nisār daulat-e-duniyā matā-e-dīñ

mansūb mujh se hai jo ba-andāz-e-dil-nashīñ

terī vo shā.irī hai mirī shā.irī nahīñ

āvāza charḳh par hai jo is dard-mañd kā

goyā vo aks hai tire qadd-e-buland kā

mere bayāñ meñ ye jo vafūr-e-surūr hai

tāq-e-suḳhan-varī meñ jo ye sham-e-tūr hai

ye jo mire charāġh kī zau duur duur hai

sarkār hī kī mauj-e-tabassum kā nuur hai

sheroñ meñ karvaTeñ ye nahīñ soz-o-sāz kī

lahreñ haiñ ye huzūr kī zulf-e-darāz kī

mujh rind-e-husn-kār kī mai-ḳhvāriyāñ na pūchh

is ḳhvāb-e-jāñ-faroz kī bedāriyāñ na pūchh

kartī hai kyuuñ sharāb ḳhirad-bāriyāñ na pūchh

be-hoshiyoñ meñ kyuuñ hai ye hushyāriyāñ na pūchh

piitā huuñ vo jo zulf kī rangīñ ghaTāoñ meñ

khiñchtī hai un ghanī huī palkoñ kī chhāñv meñ

hushyār is liye huuñ ki mai-ḳhvār huuñ tirā

sayyād-e-sher huuñ ki giraftār huuñ tirā

lahja malīh hai ki namak-ḳhvār huuñ tirā

sehhat zabān meñ hai ki bīmār huuñ tirā

tere karam se sher-o-adab kā imaam huuñ

shāhoñ pe ḳhanda-zan huuñ ki terā ġhulām huuñ

maiñ vo huuñ jis ke ġham ne tire dil meñ raah kī

ik umr jis ke ishq meñ ḳhud tū ne aah kī

soyā hai shauq sej pe terī nigāh kī

rāteñ kaTī haiñ saa.e meñ chashm-e-siyāh kī

kyuuñ kar na shāḳh-e-gul kī lachak ho bayān meñ

terī kamar kā loch hai merī zabān meñ

tarshe hue laboñ ke bahakte ḳhitāb se

zartār kākuloñ ke mahakte sahāb se

sarshār añkhḌiyoñ ke dahakte shabāb se

mauj-e-nafs ke itr se mukhḌe kī aab se

bārah baras tapā ke zamāna suhāg kā

sīñchā hai tū ne baaġh mire dil kī aag kā

garmī se jis kī barf kā devtā Dare vo aag

sho.aloñ meñ os ko jo mubaddal kare vo aag

lau se jo zamharīr kā dāman bhare vo aag

had hai jo naam nār-e-saqar par dhare vo aag

jis kī lapaT gale meñ jalātī hai raag ko

paalā hai qalb-e-nāz meñ tū ne us aag ko

ai sham-e-'josh' o mashal-e-aiwan-e-arzu

ai mehr-e-naz o mah-e-shabistan-e-arzu

ai jaan-e-dard-mandi o iman-e-arzu

ai sham-e-tur o yusuf-e-kanan-e-arzu

zarre ko aaftab to kanTe ko phul kar

ai ruh-e-sher sajda-e-shair qubul kar

dariya ka moD naghma-e-shirin ka zer-o-bam

chadar shab-e-nujum ki shabnam ka raKHt-e-nam

titli ka naz-e-raqs ghazala ka husn-e-ram

moti ki aab gul ki mahak mah-e-nau ka KHam

in sab ke imtizaj se paida hui hai tu

kitne hasin ufuq se huwaida hui hai tu

hota hai mah-washon ka wo aalam tere huzur

jaise charagh-e-murda sar-e-bazm-e-sham-e-tur

aa kar teri janab mein ai kar-saz-e-nur

palkon mein munh chhupate hain jhenpe hue ghurur

aati hai ek lahr si chehron par aah ki

aankhon mein chhuT jati hain nabzen nigah ki

raftar hai ki chandni raaton mein mauj-e-gang

ya bhairwin ki pichhle pahar qalb mein umang

ye kakulon ki tab hai ye aarizon ka rang

jis tarah jhuTpuTe mein shab-o-roz ki tarang

ru-e-mubin na gesu-e-sumbul-qawam hai

wo barhaman ki subh ye saqi ki sham hai

aawaz mein ye ras ye latafat ye iztirar

jaise subuk mahin rawan reshmi phuwar

lahje mein ye khaTak hai ki hai neshtar ki dhaar

aur gir raha hai dhaar se shabnam ka aabshaar

chahki jo tu chaman mein hawaen mahak gain

gul-barg-e-tar se os ki bunden Tapak gain

jadu hai teri saut ka gul par hazar par

jaise nasim-e-subh ki rau ju-e-bar par

naKHun kisi nigar ka chandi ke tar par

mizrab-e-aks-e-qaus rag-e-abshaar par

maujen saba ki bagh pe sahba chhiDak gain

jumbish hui labon ko to kaliyan chaTak gain

chashm-e-siyah mein wo talatum hai nur ka

jaise sharab-e-nab mein jauhar surur ka

ya chahchahon ke waqt tamawwuj tuyur ka

bandhe hue nishana koi jaise dur ka

har mauj-e-rag-e-qamat-e-gul-rez ram mein hai

goya sharab-e-tund bilorin qalam mein hai

tujh se nazar milae ye kis ki bhala majal

tere qadam ka naqsh hasinon ke KHadd-o-KHal

allah re tere husn-e-malak-soz ka jalal

jab dekhti hain KHuld se huren tera jamal

partaw se tere chehra-e-parwin-sarisht ke

ghabra ke band karti hain ghurfe bahisht ke

chehre ko rang-o-nur ka tufan kiye hue

sham-o-sharab-o-sher ka unwan kiye hue

har naqsh-e-pa ko taj-e-gulistan kiye hue

sau tur ek nigah mein pinhan kiye hue

aati hai tu chaman mein jab is tarz-o-taur se

gul dekhte hain bagh mein bulbul ko ghaur se

mere bayan mein sehr-bayani tujhi se hai

ru-e-suKHan pe KHun-e-jawani tujhi se hai

lafzon mein raqs-o-rang-o-rawani tujhi se hai

faqr-e-gada mein farr-e-kiyani tujhi se hai

fidwi ke is uruj pe karti hai ghaur kya

teri hi jutiyon ka tasadduq hai aur kya

ai kirdgar-e-ma'ni o KHallaq-e-sher-e-tar

ai jaan-e-zauq o muhsina-e-laili-e-hunar

khul jae gar ye baat ki urdu zaban par

teri nigah-e-naz ka ehsan hai kis qadar

chaaron taraf se nara-e-salle-ala uThe

tere mujassamon se zamin jagmaga uThe

mere hunar mein sarf hui hai teri nazar

KHema hai mere nam ka baala-e-bahr-o-bar

shohrat ki bazm tujh se munawwar nahin magar

farq-e-gada pe taj hai sultan barahna-sar

parwane ko wo kaun hai jo manta nahin

aur shama kis taraf hai koi jaanta nahin

dil teri bazm-e-naz mein jab se hai baryab

har KHar ek gul hai to har zarra aaftab

ek lashkar-e-nashat hai har gham ke ham-rikab

zer-e-nagin hai aalam-e-tamkin-o-iztirab

baad-e-murad o chashmak-e-tufan liye hue

hun bu-e-zulf-o-jumbish-e-mizhgan liye hue

tere labon se chashma-e-haiwan mera kalam

teri laTon se mauja-e-tufan mera kalam

teri nazar se tur-e-ba-daman mera kalam

tere suKHan se naghma-e-yazdan mera kalam

tu hai payam-e-alam-e-baala mere liye

ek wahi-e-zi-hayat hai goya mere liye

ai mah-e-sher-parwar o mehr-e-suKHan-wari

ai aab-o-rang-e-'hafiz' o ai husn-e-'anwari'

tu ne hi sabt ki hai ba-sad naz-e-dawari

mere suKHan ki pusht pe mohr-e-payambari

teri shamim-e-zulf ki daulat liye hue

mera nafas hai bu-e-risalat liye hue

dur-ha-e-ab-dar o sharar-ha-e-dil-nashin

shab-ha-e-talKH-o-tursh o sahar-ha-e-shakkarin

aql-e-nashat-KHez o junun-e-gham-afrin

daulat wo kaun hai jo meri jeb mein nahin

Takrai jab bhi mujh se KHajil sarwari hui

yun hai tere faqir ki jholi bhari hui

naghme pale hain daulat-e-guftar se teri

paya hai nutq chashm-e-suKHan-bar se teri

taqat hai dil mein nargis-e-bimar se teri

kya kya mila hai 'josh' ko sarkar se teri

banke KHayal hain KHam-e-gardan liye hue

har sher ki kalai hai kangan liye hue

ai laili-e-nahufta o ai husn-e-sharmagin

tujh par nisar daulat-e-duniya mata-e-din

mansub mujh se hai jo ba-andaz-e-dil-nashin

teri wo shairi hai meri shairi nahin

aawaza charKH par hai jo is dard-mand ka

goya wo aks hai tere qadd-e-buland ka

mere bayan mein ye jo wafur-e-surur hai

taq-e-suKHan-wari mein jo ye sham-e-tur hai

ye jo mere charagh ki zau dur dur hai

sarkar hi ki mauj-e-tabassum ka nur hai

sheron mein karwaTen ye nahin soz-o-saz ki

lahren hain ye huzur ki zulf-e-daraaz ki

mujh rind-e-husn-kar ki mai-KHwariyan na puchh

is KHwab-e-jaan-faroz ki bedariyan na puchh

karti hai kyun sharab KHirad-bariyan na puchh

be-hoshiyon mein kyun hai ye hushyariyan na puchh

pita hun wo jo zulf ki rangin ghaTaon mein

khinchti hai un ghani hui palkon ki chhanw mein

hushyar is liye hun ki mai-KHwar hun tera

sayyaad-e-sher hun ki giraftar hun tera

lahja malih hai ki namak-KHwar hun tera

sehhat zaban mein hai ki bimar hun tera

tere karam se sher-o-adab ka imam hun

shahon pe KHanda-zan hun ki tera ghulam hun

main wo hun jis ke gham ne tere dil mein rah ki

ek umr jis ke ishq mein KHud tu ne aah ki

soya hai shauq sej pe teri nigah ki

raaten kaTi hain sae mein chashm-e-siyah ki

kyun kar na shaKH-e-gul ki lachak ho bayan mein

teri kamar ka loch hai meri zaban mein

tarshe hue labon ke bahakte KHitab se

zartar kakulon ke mahakte sahab se

sarshaar ankhDiyon ke dahakte shabab se

mauj-e-nafs ke itr se mukhDe ki aab se

barah baras tapa ke zamana suhag ka

sincha hai tu ne bagh mere dil ki aag ka

garmi se jis ki barf ka dewta Dare wo aag

shoalon mein os ko jo mubaddal kare wo aag

lau se jo zamharir ka daman bhare wo aag

had hai jo nam nar-e-saqar par dhare wo aag

jis ki lapaT gale mein jalati hai rag ko

pala hai qalb-e-naz mein tu ne us aag ko