‘aql-o-‘ishq

ḳhvāh askandar-o-jam hoñ ki gadāyān-e-zalīl

jāma-e-‘aql se fitrat nahīñ hotī tabdīl

nai koī rāh-numā nai kahīñ āvāz-e-dalīl

'ishq bā-īñ-hama vārafta-o-sargarm-e-rahīl

mastī-e-bāda-e-kirdār se mahrūm hai 'aql

'ishq kā nashsha-e-guftār surāġh-e-jibrīl

'ālam-e-'ishq meñ taḳhrīb ke āsār kahāñ

'aql kā haath hai tārājī-e-gulshan meñ daḳhīl

'ishq kī shaan se larzāñ hai ḳhudā.ī ai dost

'aql bhūlī nahīñ vo manzar-e-ḳhvābīda-e-nīl

'aql kī nādira-kārī ne bahut ruḳh badle

sard hotī hī nahīñ ātish-e-gulzār-e-ḳhalīl

'aql ik ḳhvāb-e-pareshāñ ke sivā kuchh bhī nahīñ

parda-e-‘ishq meñ pinhāñ hai achhūtī tamsīl

'ishq insāñ ko sikhātā hai qavānīn-e-hayāt

'aql bechārgī-e-shauq kī ik zinda dalīl

uTh ki har zarre se miltā hai payām-e-barḳhez

kyā sunā.ī nahīñ detī tujhe āvāz-e-rahīl

KHwah askandar-o-jam hon ki gadayan-e-zalil

jama-e-‘aql se fitrat nahin hoti tabdil

nai koi rah-numa nai kahin aawaz-e-dalil

'ishq ba-in-hama warafta-o-sargarm-e-rahil

masti-e-baada-e-kirdar se mahrum hai 'aql

'ishq ka nashsha-e-guftar suragh-e-jibril

'alam-e-'ishq mein taKHrib ke aasar kahan

'aql ka hath hai taraji-e-gulshan mein daKHil

'ishq ki shan se larzan hai KHudai ai dost

'aql bhuli nahin wo manzar-e-KHwabida-e-nil

'aql ki nadira-kari ne bahut ruKH badle

sard hoti hi nahin aatish-e-gulzar-e-KHalil

'aql ek KHwab-e-pareshan ke siwa kuchh bhi nahin

parda-e-‘ishq mein pinhan hai achhuti tamsil

'ishq insan ko sikhata hai qawanin-e-hayat

'aql bechaargi-e-shauq ki ek zinda dalil

uTh ki har zarre se milta hai payam-e-barKHez

kya sunai nahin deti tujhe aawaz-e-rahil