ashab-e-girya

purānī baat hai

lekin ye anhonī sī lagtī hai

husain-ābād saarā

ta.aziya-dāroñ kī bastī thī

moharram ke dinoñ meñ shaam hote hī

husain-ābād ke mard-o-zan kaale libāsoñ meñ

azā-ḳhānoñ ke dālānoñ meñ

shab bhar marsiya paḌhte

saf-e-mātam bichhāte aur apnī chhātiyoñ ko laal kar lete

nauvīñ kī shab vo sab apne gharoñ se aag laate

aur dahaktī aag kī chāroñ taraf īñTeñ bichhā dete

hazāroñ āñkheñ mushtāqāna ik jānib ko uTh jātīñ

fazā meñ guuñj sī hotī

koī na.ara lagātā aur husain-ibn-e-alī kā naam le kar

aag kī īñToñ pe yuuñ chaltā huā aatā

ki jaise farsh-e-gul ho yā koī sabze kī chādar ho

vo phir na.ara lagātā dauḌtā bijlī kī tezī se

muqaddas āyatoñ vaalā alam hāthoñ meñ le letā

kamar se apnī kas letā

hazāroñ log us ke gard halqa bāñdh lete

aur use kashf-o-karāmat kā ḳhazīna jaan kar

apne diloñ kā mudda.ā kahte

vo paiham aag kī īñToñ pe yūñhī nāchtā rahtā

murādoñ minnatoñ kā mājrā suntā

magar jab aag kī īñToñ kī surḳhī maañd ho jaatī

to saare log halqa toḌ dete aur muqaddas āyatoñ vaalā alam

is shaḳhs ke hāthoñ se le lete

azā-ḳhānoñ ke dālānoñ meñ vāpas lauT kar aate

saf-e-mātam bichhāte

aur apnī chhātiyoñ ko laal kar lete

purani baat hai

lekin ye anhoni si lagti hai

husain-abaad sara

taziya-daron ki basti thi

moharram ke dinon mein sham hote hi

husain-abaad ke mard-o-zan kale libason mein

aza-KHanon ke dalanon mein

shab bhar marsiya paDhte

saf-e-matam bichhate aur apni chhatiyon ko lal kar lete

nauwin ki shab wo sab apne gharon se aag late

aur dahakti aag ki chaaron taraf inTen bichha dete

hazaron aankhen mushtaqana ek jaanib ko uTh jatin

faza mein gunj si hoti

koi nara lagata aur husain-ibn-e-ali ka nam le kar

aag ki inTon pe yun chalta hua aata

ki jaise farsh-e-gul ho ya koi sabze ki chadar ho

wo phir nara lagata dauDta bijli ki tezi se

muqaddas aayaton wala alam hathon mein le leta

kamar se apni kas leta

hazaron log us ke gard halqa bandh lete

aur use kashf-o-karamat ka KHazina jaan kar

apne dilon ka muddaa kahte

wo paiham aag ki inTon pe yunhi nachta rahta

muradon minnaton ka majra sunta

magar jab aag ki inTon ki surKHi mand ho jati

to sare log halqa toD dete aur muqaddas aayaton wala alam

is shaKHs ke hathon se le lete

aza-KHanon ke dalanon mein wapas lauT kar aate

saf-e-matam bichhate

aur apni chhatiyon ko lal kar lete