اور کیا چاہیئے جینے کے لیے

کون سی شے سے ہے دنیا تری محروم بتا

اور کیا چاہیئے جینے کے لیے بول ذرا

آج بھی راہ تری دیکھ رہا ہے کوئی

آج بھی جلتے ہیں آنکھوں کے دیے تیرے لیے

پھول ہونٹوں پہ تبسم کے سجا کر کوئی

منتظر آج بھی ہے تیرے لیے تیرے لیے

کیا جواز اور ہو جینے کے لیے بول صداؔ

اور کیا چاہیئے جینے کے لیے بول ذرا

آج بھی پھول کھلا ہے تری بگیا میں نیا

کتنی پیاری ہے ذرا دیکھ تو مسکان اس کی

آج بھی چھیڑا ہے کوئل نے کوئی راگ نیا

کتنی میٹھی ہے ذرا سن تو سہی تان اس کی

آج بھی وقت پہ سورج نے ہے پھر دی دستک

آج بھی صبح اگی کوکھ سے پھر پورب کی

آج بھی شام کے ماتھے پہ سجے گا سندور

آج بھی مانگ ستاروں سے بھرے گی شب کی

اور بھی کتنے ہی منظر ہیں سہانے دل کش

بند ہیں تیری نگاہیں تو انہیں کھول ذرا

کون سی شے سے ہے دنیا تری محروم بتا

اور کیا چاہیئے جینے کے لیے بول ذرا