pa-e-junun shart nahin

raah tārīk thī dushvār thā har ek qadam

manzil-e-zīst ke har gaam pe Thokar khaa.ī

mash.al-e-azm liye phir bhī meñ baḌhtā hī rahā

dard-o-ālām kī āñdhī jo kabhī tez huī

dāman-e-shauq meñ mash.al ko chhupāyā maiñ ne

bahar bandagī-o-sho.alagī mash.al-e-azm

merī shiryānoñ kā har qatra-e-ḳhūñ vāqif huā

dāman-e-shauq bhī jal-bujh ke kahīñ raakh huā

aur phir dhundlī huī bujhtī ga.ī mash.al-e-azm

raah kuchh aur bhī tārīk vo siyah hotī ga.ī

ghor añdhiyāre ke ifrīt mujhe Daste rahe

zindagī apnī un hī bhūl-bhulayyoñ meñ rahī

apnī manzil kā magar mujh ko pata mil na sakā

ham-safar aur bhī kuchh saath chale the mere

un meñ vo josh-e-junūñ aur na vo azm-o-yaqīñ

mast-o-sarshār rahe bāda-e-ġhaflat pī kar

ḳhvāb-e-ḳhargosh meñ har gaam pe mad.hosh rahe

un kī manzil ne magar un ke qadam chuum liye

un kī us nusrat-e-be-jā pe mujhe rashk nahīñ

aaj bhī mujh meñ hai vo josh-e-junūñ azm-o-yaqīñ

aaj bhī naaz hai go jahd-o-amal pe apne

maslahat-kosh nahīñ aaj bhī ma.asūm-e-junūñ

ḳhizr kī bejā ḳhushāmad pe nahīñ raazī hunūz

haañ magar zehn ke parde pe ubharte haiñ savāl

ḳhizr kī bejā ḳhushāmad hī muqaddam hai yahāñ

vasl-e-manzil ke liye pā-e-junūñ shart nahīñ

rah tarik thi dushwar tha har ek qadam

manzil-e-zist ke har gam pe Thokar khai

mashal-e-azm liye phir bhi mein baDhta hi raha

dard-o-alam ki aandhi jo kabhi tez hui

daman-e-shauq mein mashal ko chhupaya main ne

bahar bandagi-o-shoalagi mashal-e-azm

meri shiryanon ka har qatra-e-KHun waqif hua

daman-e-shauq bhi jal-bujh ke kahin rakh hua

aur phir dhundli hui bujhti gai mashal-e-azm

rah kuchh aur bhi tarik wo siyah hoti gai

ghor andhiyare ke ifrit mujhe Daste rahe

zindagi apni un hi bhul-bhulayyon mein rahi

apni manzil ka magar mujh ko pata mil na saka

ham-safar aur bhi kuchh sath chale the mere

un mein wo josh-e-junun aur na wo azm-o-yaqin

mast-o-sarshaar rahe baada-e-ghaflat pi kar

KHwab-e-KHargosh mein har gam pe madhosh rahe

un ki manzil ne magar un ke qadam chum liye

un ki us nusrat-e-be-ja pe mujhe rashk nahin

aaj bhi mujh mein hai wo josh-e-junun azm-o-yaqin

aaj bhi naz hai go jahd-o-amal pe apne

maslahat-kosh nahin aaj bhi masum-e-junun

KHizr ki beja KHushamad pe nahin raazi hunuz

han magar zehn ke parde pe ubharte hain sawal

KHizr ki beja KHushamad hi muqaddam hai yahan

wasl-e-manzil ke liye pa-e-junun shart nahin