baz-gasht

naġhma-zār-e-dard kī jānib chale ham

ek bhī zarra na kuchlā jaa.e is raftār se

naġhma-zār-e-dard kī jānib chale ham

kunj meñ peḌoñ ke sūraj jhāñktā thā

kohsāroñ sabza-zāroñ meñ jhamaktī raushnī kā jashn thā

jashn jaarī hī rahegā tā-abad

jaarī rahe

naġhma-zār-e-dard kī jānib chale ham

lāl-o-marmar se guñdhā qālib

aur is ke mehvar us ke qarīb

bijliyoñ jaisā musaffā ik vajūd

chār-sū bikhre hue ḳhāmosh suune āsmāñ

ham kahāñ haiñ ham kahāñ naġhma-zār-e-dard hai ye ham kahāñ

itnā be-āvāz jaise

aatmā apnī shuā.eñ

reshe reshe se badan ke khīñch le

āhistagī se be-gazand

aur duurī be-fuġhāñ ho jism kī aur ruuh kī

kyā subuk-raftār kar detī hai ham ko be-dilī be-hāsilī

jaise ik bādal kā TukḌā

apnī chhāgal pheñk de ūñchī fazā meñ

pyāse zarroñ kī taraf

phir halke-phulke pañkh phailā.e uḌe

halkore le

ik miTtī bantī rañg kī tahrīr sī

sairāb zarre us ko dekheñ

aur pukār uTTheñ

vo kafūrī sā sho.ala azmat-e-nā-ras

davām-e-dard hai vo surḳh nirmal raushnī

lo saañs ke sar-chashme sūkhe har shikāyat miT ga.ī

kyā shikāyat saañs ke sar-chashma se un ko rahī

jo saañs lete haiñ yahāñ

mauj-e-be-hañgām ḳhanda

kaise phūTī mere lab se

koī shaktī ham meñ hai

jo yuuñ hameñ pāmāl kar hañs sake

ye hameñ āġhāz hī se ḳhatm karne par tulī thī

chāhe phir ḳhud hī mujāvir ban sake anjām-kār

ehtijāj us kā jo ik shaktī hai mujh meñ

kis qadar pur-shor hai

kis qadar pur-zor hai

naġhma-zār-e-dard se aage liye jaatā mujh ko

in fazāoñ meñ jahāñ

bāzgasht ik giit ban jaatī hai us kī

jaise sab Tiile chaTāneñ aur kuhistāñ

saañs ke chashme meñ shāmil haiñ

dhaḌakte zī-nafas aur ham-navā

naghma-zar-e-dard ki jaanib chale hum

ek bhi zarra na kuchla jae is raftar se

naghma-zar-e-dard ki jaanib chale hum

kunj mein peDon ke suraj jhankta tha

kohsaron sabza-zaron mein jhamakti raushni ka jashn tha

jashn jari hi rahega ta-abad

jari rahe

naghma-zar-e-dard ki jaanib chale hum

lal-o-marmar se gundha qalib

aur is ke mehwar us ke qarib

bijliyon jaisa musaffa ek wajud

chaar-su bikhre hue KHamosh sune aasman

hum kahan hain hum kahan naghma-zar-e-dard hai ye hum kahan

itna be-awaz jaise

aatma apni shuaen

reshe reshe se badan ke khinch le

aahistagi se be-gazand

aur duri be-fughan ho jism ki aur ruh ki

kya subuk-raftar kar deti hai hum ko be-dili be-hasili

jaise ek baadal ka TukDa

apni chhagal phenk de unchi faza mein

pyase zarron ki taraf

phir halke-phulke pankh phailae uDe

halkore le

ek miTti banti rang ki tahrir si

sairab zarre us ko dekhen

aur pukar uTThen

wo kafuri sa shoala azmat-e-na-ras

dawam-e-dard hai wo surKH nirmal raushni

lo sans ke sar-chashme sukhe har shikayat miT gai

kya shikayat sans ke sar-chashma se un ko rahi

jo sans lete hain yahan

mauj-e-be-hangam KHanda

kaise phuTi mere lab se

koi shakti hum mein hai

jo yun hamein pamal kar hans sake

ye hamein aaghaz hi se KHatm karne par tuli thi

chahe phir KHud hi mujawir ban sake anjam-kar

ehtijaj us ka jo ek shakti hai mujh mein

kis qadar pur-shor hai

kis qadar pur-zor hai

naghma-zar-e-dard se aage liye jata mujh ko

in fazaon mein jahan

bazgasht ek git ban jati hai us ki

jaise sab Tile chaTanen aur kuhistan

sans ke chashme mein shamil hain

dhaDakte zi-nafas aur ham-nawa