بدل لی بیچ سفر میں

بدل لی بیچ سفر میں ہی راہ آپ نے بھی

کہ زر کی چھاؤں میں لے لی پناہ آپ نے بھی

مری امید کو اک دن اجڑ ہی جانا تھا

خود اپنی ذات کیوں کر لی تباہ آپ نے بھی

بجا کہ عشق بھی کچھ کچھ تھا مصلحت کا شکار

ہوا کے رخ کی طرح کی ہے چاہ آپ نے بھی

کبھی تو دھڑکنیں دل کی سنائی دیتی تھیں

سنی نہ جگ کی طرح آج آہ آپ نے بھی

ردیف قافیے سب آپ کے لیے تھے مرے

مگر نہ بھول کے کی واہ واہ آپ نے بھی

سوائے صدق مرے پاس اور کچھ بھی نہیں

خرید رکھے ہیں جھوٹے گواہ آپ نے بھی

وفائیں آپ کی سنگت پہ ناز کرتی تھیں

صلہ وفا کا دیا ہے کراہ آپ نے بھی

رشیدؔ لوگ تو بستی اجاڑ دیتے ہیں

کیا ہے دل کو دکھا کر گناہ آپ نے بھی