badalne ka koi mausam nahin hota

chale the log jab ghar se

to ik va.ade kī taḳhtī apnī peshānī par

rakh kar laa.e the

jis kī gavāhī meñ

safar ko aage baḌhnā thā

aur us ke saath

ḳhvāboñ ḳhvāhishoñ ke naam

us vīrān ghar ko aage baḌhnā thā

to ik va.ade kī taḳhtī thī

bahut din tak jo raushan thī sarāboñ meñ

purānī dāstāneñ jāgtī taaza nisāboñ meñ

bahut din tak havā meñ sandalī ḳhushbū mahaktī thī

safar meñ chāñdnī ghar kī chhiTaktī thī

chale the log jab ghar se

bahut mānūs the

har gum-shuda vīrān manzar se

chale the log jab ghar se

purānī baat lagtī hai

bahut sī kaḌiyāñ jaise biich se

ab TūTtī jaatī haiñ

ruteñ guzrīñ huī ab haath se

yuuñ chhūTtī jaatī haiñ

jaise āyateñ bujhne lagī hoñ

sail-e-zulmat meñ

vo ik va.ade kī taḳhtī gum huī

tūfān-e-hairat meñ

badalne kā koī mausam nahīñ hotā

bahut din jab badalne meñ guzar jaate haiñ

kuchh badle hue kā ġham nahīñ hotā

chale the log jab ghar se

to ek wade ki taKHti apni peshani par

rakh kar lae the

jis ki gawahi mein

safar ko aage baDhna tha

aur us ke sath

KHwabon KHwahishon ke nam

us viran ghar ko aage baDhna tha

to ek wade ki taKHti thi

bahut din tak jo raushan thi sarabon mein

purani dastanen jagti taza nisabon mein

bahut din tak hawa mein sandali KHushbu mahakti thi

safar mein chandni ghar ki chhiTakti thi

chale the log jab ghar se

bahut manus the

har gum-shuda viran manzar se

chale the log jab ghar se

purani baat lagti hai

bahut si kaDiyan jaise bich se

ab TuTti jati hain

ruten guzrin hui ab hath se

yun chhuTti jati hain

jaise aayaten bujhne lagi hon

sail-e-zulmat mein

wo ek wade ki taKHti gum hui

tufan-e-hairat mein

badalne ka koi mausam nahin hota

bahut din jab badalne mein guzar jate hain

kuchh badle hue ka gham nahin hota