بن سے بن تک

اچھی سیتا

بن سے لوٹ آئی ہو لیکن گھر سے بھی واپس جانا ہے

کہنا مانو دھرتی ماں کا

چاہ بڑا مہنگا سودا ہے

وہ بھی رام کی جس نے راون کو جیتا ہے

دریا اپنی ہی موجوں سے ہو جاتا ہے مغلوب اکثر

اندر کا طوفان بڑا ہے

صحرا میں کھاتے ہیں بگولے کیا کیا چکر

حد سے زیادہ جی کا امنڈنا کب اچھا ہے

زخموں سے ہیں کتنا چور گرجتے بادل

کتنا بھیانک یہ شعلہ ہے

تم پر بھی چمکی ہے بجلی رام کا درد امڈ آیا ہے

چاہ بڑا مہنگا سودا ہے

کہنا مانو دھرتی ماں کا

راج محل کا اونچا پھاٹک بند ہوا تو بند ہوا