be-haya

hamīñ to haiñ vo

jo tai kareñge

ki in ke jismoñ pe kis kā haq hai

hamīñ to haiñ vo

jo tai kareñge

ki kis se in ke nikāh hoñge

ye kis ke bistar kī zīnateñ haiñ

vo kaun hogā jo apne hoñToñ ko

in ke jismoñ kī aab degā

bhale mohabbat kisī ke kahne pe

aaj tak ho sakī na hogī

magar ye ham tai kareñge

in ko kise basānā hai apne dil meñ

ham in ke mālik haiñ

jab bhī chāheñ

inheñ lihāfoñ meñ khīñch laa.eñ

aur in kī rūhoñ meñ daañt gāḌeñ

ye maañ baneñgī

to ham batā.eñge

in ke jismoñ ne kitne bachchoñ ko Dhālnā hai

hamāre bachchoñ ke peT bharne

agar ye koThe pe jā ke apnā badan bhī becheñ

to ham batā.eñge

kis ko kitne meñ kitnā becheñ

hamīñ ko haq hai

ki in ke gāhak jo ḳhud hamīñ haiñ se

saarī qīmat vasūl kar leñ

hamīñ ko haq hai ki in kī āñkheñ

hasīn chehre shaffāf paañv

safed rāneñ darāz zulfeñ

aur ātishīñ-lab dikhā dikhā kar

cream sābun safed kapḌe aur aam becheñ

dukāñ chalā.eñ naf' kamā.eñ

hamīñ to haiñ jo ye tai kareñge

ye kis sahīfe kī kaun sī āyateñ paḌheñgī

ye kaun hotī haiñ

apnī marzī kā rang pahneñ

schōl jaa.eñ hameñ paḌhā.eñ

hameñ batā.eñ

ki in kā rab bhī vahī hai jis ne hameñ banāyā

barābarī ke sabaq sikhā.eñ

ye lauñDiyāñ haiñ ye jūtiyāñ haiñ

ye kaun hotī haiñ apnī marzī se jiine vaalī

batāne vaale hameñ yahī to batā ga.e haiñ

jo hukmrānoñ kī baat Tāleñ

jo apne bhaa.ī se hissa māñgeñ

jo shauharoñ ko ḳhudā na samjheñ

jo qadre mushkil savāl pūchheñ

jo apnī mehnat kā badla māñgeñ

jo ājiroñ se zabāñ laḌā.eñ

jo apne jismoñ pe haq jatā.eñ

vo be-hayā haiñ

hamin to hain wo

jo tai karenge

ki in ke jismon pe kis ka haq hai

hamin to hain wo

jo tai karenge

ki kis se in ke nikah honge

ye kis ke bistar ki zinaten hain

wo kaun hoga jo apne honTon ko

in ke jismon ki aab dega

bhale mohabbat kisi ke kahne pe

aaj tak ho saki na hogi

magar ye hum tai karenge

in ko kise basana hai apne dil mein

hum in ke malik hain

jab bhi chahen

inhen lihafon mein khinch laen

aur in ki ruhon mein dant gaDen

ye man banengi

to hum bataenge

in ke jismon ne kitne bachchon ko Dhaalna hai

hamare bachchon ke peT bharne

agar ye koThe pe ja ke apna badan bhi bechen

to hum bataenge

kis ko kitne mein kitna bechen

hamin ko haq hai

ki in ke gahak jo KHud hamin hain se

sari qimat wasul kar len

hamin ko haq hai ki in ki aankhen

hasin chehre shaffaf panw

safed ranen daraaz zulfen

aur aatishin-lab dikha dikha kar

cream sabun safed kapDe aur aam bechen

dukan chalaen naf' kamaen

hamin to hain jo ye tai karenge

ye kis sahife ki kaun si aayaten paDhengi

ye kaun hoti hain

apni marzi ka rang pahnen

school jaen hamein paDhaen

hamein bataen

ki in ka rab bhi wahi hai jis ne hamein banaya

barabari ke sabaq sikhaen

ye launDiyan hain ye jutiyan hain

ye kaun hoti hain apni marzi se jine wali

batane wale hamein yahi to bata gae hain

jo hukmranon ki baat Talen

jo apne bhai se hissa mangen

jo shauharon ko KHuda na samjhen

jo qadre mushkil sawal puchhen

jo apni mehnat ka badla mangen

jo aajiron se zaban laDaen

jo apne jismon pe haq jataen

wo be-haya hain