be-iltifati

maiñ ne har ġham meñ tirā saath diyā hai ab tak

terī har taaza masarrat pe huā huuñ masrūr

apnī qismat ke badalte hue dhāroñ ke sivā

terī qismat ke bhañvar se bhī huā huuñ majbūr

tere siine kā har ik raaz batā saktā huuñ

mujh meñ poshīda nahīñ koī tirā soz-e-darūñ

fikr-e-mānūs pe zāhir hai har ik ḳhvāb-e-jamīl

aur har ḳhvāb se miltā hai tujhe kitnā sukūñ

aaj tak tū ne magar mujh se na pūchhā hai kabhī

kyuuñ mire ġham se tirā chehra utar jaatā hai?

jab mire dil meñ lahakte haiñ masarrat ke kañval

kyuuñ tirā chehra masarrat se nikhar jaatā hai?

main ne har gham mein tera sath diya hai ab tak

teri har taza masarrat pe hua hun masrur

apni qismat ke badalte hue dhaaron ke siwa

teri qismat ke bhanwar se bhi hua hun majbur

tere sine ka har ek raaz bata sakta hun

mujh mein poshida nahin koi tera soz-e-darun

fikr-e-manus pe zahir hai har ek KHwab-e-jamil

aur har KHwab se milta hai tujhe kitna sukun

aaj tak tu ne magar mujh se na puchha hai kabhi

kyun mere gham se tera chehra utar jata hai?

jab mere dil mein lahakte hain masarrat ke kanwal

kyun tera chehra masarrat se nikhar jata hai?