be-zamini

maiñ ek tesha-ba-dast insāñ

mujhe ḳharāboñ kī justujū hai

mujhe pahāḌoñ kī aarzū hai

maiñ chāhtā huuñ ki is jahāñ ke

tamām dukhḌe ukhāḌ pheñkūñ

maiñ chāhtā huuñ ki aane vaale na.e zamāne kī

saarī rāheñ

harī-bharī hoñ

har ik shajar ik libās pahne

na.ī vaz.a kā

har ek gul par shabāb mahke

na.ī tarah kā

maiñ chāhtā huuñ ki nasl-e-insāñ jo aa rahī hai

qarār bāñTe

sukūn bo.e to pyaar kaaTe

magar mire ahd ke ye insāñ

mire muqābil khaḌe hue haiñ

pahāḌ ban kar

maiñ apnā tesha chalā.ūñ kis par

inhī meñ koī hai merā bhaa.ī

koī chachā hai

maiñ sochtā huuñ

uThā ke teshe ko is zamīñ par

lakīr khīñchūñ musālahat kī

phir apne hisse kī sab zamīñ par

chalā.ūñ tesha

magar ḳhayāloñ meñ baat Thahrī

mirī zamīñ ke tamām hisse

mire hī bachchoñ ne bech khaa.e

main ek tesha-ba-dast insan

mujhe KHarabon ki justuju hai

mujhe pahaDon ki aarzu hai

main chahta hun ki is jahan ke

tamam dukhDe ukhaD phenkun

main chahta hun ki aane wale nae zamane ki

sari rahen

hari-bhari hon

har ek shajar ek libas pahne

nai waza ka

har ek gul par shabab mahke

nai tarah ka

main chahta hun ki nasl-e-insan jo aa rahi hai

qarar banTe

sukun boe to pyar kaTe

magar mere ahd ke ye insan

mere muqabil khaDe hue hain

pahaD ban kar

main apna tesha chalaun kis par

inhi mein koi hai mera bhai

koi chacha hai

main sochta hun

uTha ke teshe ko is zamin par

lakir khinchun musalahat ki

phir apne hisse ki sab zamin par

chalaun tesha

magar KHayalon mein baat Thahri

meri zamin ke tamam hisse

mere hi bachchon ne bech khae