beTi ke nam

mirī beTī

ba-zāhir tum bhī kitnī be-zarar mā'lūm hotī ho

sabhī kahte haiñ

maañ kī tarh maddham naqsh

āñkheñ vājibī sī

aur rang aur ruup bhī aisā nahīñ

jo rāsta chalte ko dīvāna banā de

yā ki bastī ke

javāñ hote hue beToñ kī maa.eñ

dam-ba-ḳhud rah jaa.eñ

aur laḌke daraḳhtoñ ke tale 'umreñ bitā deñ

ba-zāhir tum meñ aisī koī bhī ḳhūbī nahīñ hai

magar jab boltī ho mujh ko tum se ḳhauf aatā hai

mirī jaañ bāvajūd is ke

na maiñ haarī mohabbat meñ

na koī jhuuT kā kāñTā hī uljhā mere dāman se

mujhe to aarzū hī rah ga.ī bas be-vafā.ī kī

'ajab kam-baḳht ḳhvāhish thī

ye 'aurat bhī 'ajab shai hai

kahīñ to ye sarāpā jism hotī hai nirī Thokar

kahīñ par ye sarāpā dil nirī 'aurat nirī ulfat

magar ham jis munāfiq 'ahd kī taḳhlīq haiñ us meñ

agar 'aurat kahīñ sahvan sarāpā zehn ho jaa.e

to goyā ik qayāmat hai

yahī to hai ki jab tum boltī ho

ek an-jānā sā Dar mujh ko satātā hai

tumheñ kaise maiñ samjhā.ūñ

jo in talvoñ meñ kāñTe haiñ

jo is siine meñ chhāle haiñ

jo in rastoñ meñ qabreñ haiñ

magar phir dhyān aatā hai

ki maiñ ne to tumhāre rāste ke chun liye kāñTe

charāġhāñ kar diyā qabroñ pe ThanDe kar diye chhāle

tumhāre vāste to phuul hoñge rāste saare

mirā dil muskurātā hai

meri beTi

ba-zahir tum bhi kitni be-zarar ma'lum hoti ho

sabhi kahte hain

man ki tarh maddham naqsh

aankhen wajibi si

aur rang aur rup bhi aisa nahin

jo rasta chalte ko diwana bana de

ya ki basti ke

jawan hote hue beTon ki maen

dam-ba-KHud rah jaen

aur laDke daraKHton ke tale 'umren bita den

ba-zahir tum mein aisi koi bhi KHubi nahin hai

magar jab bolti ho mujh ko tum se KHauf aata hai

meri jaan bawajud is ke

na main haari mohabbat mein

na koi jhuT ka kanTa hi uljha mere daman se

mujhe to aarzu hi rah gai bas be-wafai ki

'ajab kam-baKHt KHwahish thi

ye 'aurat bhi 'ajab shai hai

kahin to ye sarapa jism hoti hai niri Thokar

kahin par ye sarapa dil niri 'aurat niri ulfat

magar hum jis munafiq 'ahd ki taKHliq hain us mein

agar 'aurat kahin sahwan sarapa zehn ho jae

to goya ek qayamat hai

yahi to hai ki jab tum bolti ho

ek an-jaana sa Dar mujh ko satata hai

tumhein kaise main samjhaun

jo in talwon mein kanTe hain

jo is sine mein chhaale hain

jo in raston mein qabren hain

magar phir dhyan aata hai

ki main ne to tumhaare raste ke chun liye kanTe

charaghan kar diya qabron pe ThanDe kar diye chhaale

tumhaare waste to phul honge raste sare

mera dil muskuraata hai