bhopal tal ke nam

ai baḌe tālāb

ai aabī zaḳhīre ke amiiñ

tere is shaffāf paanī meñ ye kyā tāsīr hai

kyoñ Thahar jaatā hai rahrau dekh kar terā jamāl

kyoñ pakaḌ lete haiñ qadmoñ ko tire ye sabza-zār

āb-e-larzīda meñ tere kyā likhā hai ye batā

jis kā ik ik harf paḌhne meñ guzar jaatī hai 'umr

phir bhī khultā hī nahīñ hai raaz tere husn kā

phir bhī jaatā hī nahīñ hai terā ye aabī tilism

ai baḌe tālāb ai aabī zaḳhīre ke amiiñ

kitnī sadiyoñ kī tamāzat tere is paanī meñ hai

kitne mausam karvaTeñ lete haiñ lahroñ meñ tirī

kitnī tahzīboñ ke zāmin haiñ tire ye murġh-zār

ai baḌe tālāb kuchh tū hī batā kyā ramz hai

kyoñ tujhe ghere hue haiñ ye pahāḌī silsile

kyoñ sajā rakkhe haiñ tū ne har taraf ye sabza-zār

kis liye hotī hai ḳhilqat terī vus'at par nisār

tū na jaijūñ hai na hai dariyā-e-'thames'

phir bhī sāhil par tire qurbāñ hai husn-e-be-karāñ

phir bhī siine par tire raqsāñ haiñ kitnī kashtiyāñ

phir bhī kaif-e-zindagī hai terī maujoñ se 'ayāñ

ai baḌe tālāb ai aabī zaḳhīre ke amiiñ

tujh ko kuchh mā'lūm bhī hai apnī tārīḳh-e-hasīñ

kitnī tahzīboñ kā shāhid hai tirā āb-e-ravāñ

kitne jazboñ kī tahārat terī in lahroñ meñ hai

kitne mausam ho ga.e shādāb āñchal se tire

qāfile kitne tire dāman meñ aa kar bas ga.e

kaise kaise gauhar-e-nāyāb tere 'ishq meñ

ho ke be-qīmat tirī āġhosh meñ gum ho ga.e

aaj un kā nām-levā bhī yahāñ koī nahīñ

ai baḌe tālāb ai aabī zaḳhīre ke amiiñ

tere pahlū meñ haiñ ḳhvābīda vo ahl-e-'ishq bhī

jin ke teshe ne the kaaTe jahl ke koh-e-girāñ

jin kī himmat ne basā.ī thiiñ yahāñ par bastiyāñ

bastiyoñ meñ pyaar ke chashme hī the har-sū ravāñ

jin pe qābiz haiñ magar ab vaqt kī saffākiyāñ

vaqt kī saffākiyoñ kā ek shāhid tū bhī hai

vaqt kī saffākiyoñ kā ek shāhid maiñ bhī huuñ

phir bhī ai tālāb ai aabī zaḳhīre ke amiiñ

yuuñ to terā ye javāñ-paikar bazāhir taal hai

dar-haqīqat tū vaqār-o-‘azmat-e-bhopāl hai

ai baDe talab

ai aabi zaKHire ke amin

tere is shaffaf pani mein ye kya tasir hai

kyon Thahar jata hai rahrau dekh kar tera jamal

kyon pakaD lete hain qadmon ko tere ye sabza-zar

aab-e-larzida mein tere kya likha hai ye bata

jis ka ek ek harf paDhne mein guzar jati hai 'umr

phir bhi khulta hi nahin hai raaz tere husn ka

phir bhi jata hi nahin hai tera ye aabi tilism

ai baDe talab ai aabi zaKHire ke amin

kitni sadiyon ki tamazat tere is pani mein hai

kitne mausam karwaTen lete hain lahron mein teri

kitni tahzibon ke zamin hain tere ye murgh-zar

ai baDe talab kuchh tu hi bata kya ramz hai

kyon tujhe ghere hue hain ye pahaDi silsile

kyon saja rakkhe hain tu ne har taraf ye sabza-zar

kis liye hoti hai KHilqat teri wus'at par nisar

tu na jaijun hai na hai dariya-e-'thames'

phir bhi sahil par tere qurban hai husn-e-be-karan

phir bhi sine par tere raqsan hain kitni kashtiyan

phir bhi kaif-e-zindagi hai teri maujon se 'ayan

ai baDe talab ai aabi zaKHire ke amin

tujh ko kuchh ma'lum bhi hai apni tariKH-e-hasin

kitni tahzibon ka shahid hai tera aab-e-rawan

kitne jazbon ki tahaarat teri in lahron mein hai

kitne mausam ho gae shadab aanchal se tere

qafile kitne tere daman mein aa kar bas gae

kaise kaise gauhar-e-nayab tere 'ishq mein

ho ke be-qimat teri aaghosh mein gum ho gae

aaj un ka nam-lewa bhi yahan koi nahin

ai baDe talab ai aabi zaKHire ke amin

tere pahlu mein hain KHwabida wo ahl-e-'ishq bhi

jin ke teshe ne the kaTe jahl ke koh-e-giran

jin ki himmat ne basai thin yahan par bastiyan

bastiyon mein pyar ke chashme hi the har-su rawan

jin pe qabiz hain magar ab waqt ki saffakiyan

waqt ki saffakiyon ka ek shahid tu bhi hai

waqt ki saffakiyon ka ek shahid main bhi hun

phir bhi ai talab ai aabi zaKHire ke amin

yun to tera ye jawan-paikar bazahir tal hai

dar-haqiqat tu waqar-o-‘azmat-e-bhopal hai