bhuki nasl ka tarana

maiñ bhūkī nasl huuñ

mere malūl o muzmahil chehra pe

ThanDī chāñdnī kā aks mat DhūñDo

mirā be-rañg-o-bū chehra

jamī hai an-ginat fāqoñ kī jis par dhuul barsoñ se

zamīñ ke chand fir.aunoñ ko apnī ḳhashmagīñ nazroñ se taktā hai

mire ajdād bhī

merī tarah bhūke the lekin mujh meñ aur un meñ

zamīn-o-āsmāñ kā farq hai shāyad

vo apnī bhuuk ko taqdīr kā likkhā samajhte the

qanā.at un kā takiya thā

tavakkul un kā sheva thā

magar maiñ aisī har jhūTī tasallī kā muḳhālif huuñ

muqaddar ke añdheroñ meñ nahīñ

merā yaqīñ hai raushnī-e-sub.h-e-fardā meñ

maiñ bhūkī nasl huuñ

mere laboñ par nāla-o-fariyād kī lai ke evaz

ik aag hai

tevar meñ ġhussa hai

ye vo ġhussa hai jis se

merā dushman thartharātā hai

main bhuki nasl hun

mere malul o muzmahil chehra pe

ThanDi chandni ka aks mat DhunDo

mera be-rang-o-bu chehra

jami hai an-ginat faqon ki jis par dhul barson se

zamin ke chand firaunon ko apni KHashmagin nazron se takta hai

mere ajdad bhi

meri tarah bhuke the lekin mujh mein aur un mein

zamin-o-asman ka farq hai shayad

wo apni bhuk ko taqdir ka likkha samajhte the

qanaat un ka takiya tha

tawakkul un ka shewa tha

magar main aisi har jhuTi tasalli ka muKHalif hun

muqaddar ke andheron mein nahin

mera yaqin hai raushni-e-subh-e-farda mein

main bhuki nasl hun

mere labon par nala-o-fariyaad ki lai ke ewaz

ek aag hai

tewar mein ghussa hai

ye wo ghussa hai jis se

mera dushman thartharaata hai