bikharte lamhe

maiñ shab kī tiira fazāoñ meñ

ridā ġhulāmī kī

oḌh kar yuuñ paḌā huā thā

ki jaise

koī za.iif insān

shabāb kī raunaqoñ ko kho kar

hayāt ke din guzārtā ho

to yuuñ huā

god meñ sahar kī

kiran masarrat kī jagmagā.ī

ufuq se uTThā

sahar kā sūraj

na.ī adā se nirāle Dhab se

the us ke ruḳh par

vafā ke tevar

shab-e-ġhulāmī ke zinda-dāroñ

ke āhanī azm kī lakīreñ

lahū kī surḳhī

vo ġhāliban tiis saal pahle

kī ek dilkash hasīñ sahar thī

ki dhuñdle dhuñdle se aks ab tak

mire ḳhayāloñ meñ mushta.il haiñ

vo din the merī tufūliyat ke

hazāroñ lamhe bikhar bikhar kar simaT ga.e the

bahār ke din palaT ga.e the

to vaqt biitā

aur aaj huuñ maiñ vatan kā apne javān shahrī

vahī zamīñ hai

vahī falak hai

vahī fazā hai

magar na jaane chubhan sī kyoñ dil meñ ho rahī hai

nizām-e-nau bhī

na raas aaya vatan ko shāyad

jahāñ bhī dekho

uThā hai nafrat kā ek tūfāñ

dhuāñ dhuāñ hai har ek manzar

zamīñ se tā-āsmāñ abhī tak

hazāroñ sho.ale bhaḌak rahe haiñ

jhulas rahā hai ab in meñ insāniyat kā dāman

kahīñ bhī kunj-e-amāñ nahīñ hai

ujaḌ rahī haiñ hazāroñ māñgeñ

lahū ke chashme ubal rahe haiñ

javān bahneñ

za.iif maa.eñ

ab apnī izzat ko ro rahī haiñ

kahīñ pe bachche bilak rahe haiñ

ki jaise lamhe bikhar rahe haiñ

ki jaise lamhe bikhar ga.e hoñ

main shab ki tera fazaon mein

rida ghulami ki

oDh kar yun paDa hua tha

ki jaise

koi zaif insan

shabab ki raunaqon ko kho kar

hayat ke din guzarta ho

to yun hua

god mein sahar ki

kiran masarrat ki jagmagai

ufuq se uTTha

sahar ka suraj

nai ada se nirale Dhab se

the us ke ruKH par

wafa ke tewar

shab-e-ghulami ke zinda-daron

ke aahani azm ki lakiren

lahu ki surKHi

wo ghaaliban tis sal pahle

ki ek dilkash hasin sahar thi

ki dhundle dhundle se aks ab tak

mere KHayalon mein mushtail hain

wo din the meri tufuliyat ke

hazaron lamhe bikhar bikhar kar simaT gae the

bahaar ke din palaT gae the

to waqt bita

aur aaj hun main watan ka apne jawan shahri

wahi zamin hai

wahi falak hai

wahi faza hai

magar na jaane chubhan si kyon dil mein ho rahi hai

nizam-e-nau bhi

na ras aaya watan ko shayad

jahan bhi dekho

uTha hai nafrat ka ek tufan

dhuan dhuan hai har ek manzar

zamin se ta-asman abhi tak

hazaron shoale bhaDak rahe hain

jhulas raha hai ab in mein insaniyat ka daman

kahin bhi kunj-e-aman nahin hai

ujaD rahi hain hazaron mangen

lahu ke chashme ubal rahe hain

jawan bahnen

zaif maen

ab apni izzat ko ro rahi hain

kahin pe bachche bilak rahe hain

ki jaise lamhe bikhar rahe hain

ki jaise lamhe bikhar gae hon