bura man gae

maiñ ne chhoḌā jo paTāḳha to burā maan ga.e

ḳhvāb-e-ġhaflat se jagāyā to burā maan ga.e

ham ko bhī daadī kī is chiiz pe haq hāsil thā

khā liyā thoḌā sā halva to burā maan ga.e

merī tauhīn thī khaTmal se makoḌe se shikast

nochnā jo paḌā takiya to burā maan ga.e

ab bhī baaqī haiñ vahī zulm-o-sitam teacher ke

jo kahā lafz-e-ahinsā to burā maan ga.e

fail kartā hī to aayā huuñ sabhī saal magar

ab kī daddy ko sunāyā to burā maan ga.e

maiñ bhī siine meñ to āḳhir vahī dil rakhtā huuñ

raat picture se jo aayā to burā maan ga.e

jī meñ aayā thā ki kuchh chhup ke kamā luuñ shohrat

ek hī sher churāyā to burā maan ga.e

koī mujh sā na ho mahrūm jahāñ meñ 'ādil'

hāl-e-dil jab bhī sunāyā to burā maan ga.e

hotī aa.ī hai ki achchhoñ ko burā kahte haiñ

kyā huā maiñ bhī jo achchhā to burā maan ga.e

main ne chhoDa jo paTaKHa to bura man gae

KHwab-e-ghaflat se jagaya to bura man gae

hum ko bhi dadi ki is chiz pe haq hasil tha

kha liya thoDa sa halwa to bura man gae

meri tauhin thi khaTmal se makoDe se shikast

nochna jo paDa takiya to bura man gae

ab bhi baqi hain wahi zulm-o-sitam teacher ke

jo kaha lafz-e-ahinsa to bura man gae

fail karta hi to aaya hun sabhi sal magar

ab ki daddy ko sunaya to bura man gae

main bhi sine mein to aaKHir wahi dil rakhta hun

raat picture se jo aaya to bura man gae

ji mein aaya tha ki kuchh chhup ke kama lun shohrat

ek hi sher churaya to bura man gae

koi mujh sa na ho mahrum jahan mein 'adil'

haal-e-dil jab bhi sunaya to bura man gae

hoti aai hai ki achchhon ko bura kahte hain

kya hua main bhi jo achchha to bura man gae