chand aur tare salamat

chāñd aur taare salāmat kahkashāñ qaa.em rahe

ye zamīñ qaa.em rahe ye āsmāñ qaa.em rahe

yā ilāhī desh meñ amn-o-amāñ qaa.em rahe

raqs-e-hastī ke liye bazm-e-jahāñ qaa.em rahe

hashr tak qaa.em rahe merā chaman merā vatan

aur is kī ye bahār-e-jāvedāñ qaa.em rahe

yā ilāhī hashr tak mahkeñ mire gulshan ke phuul

bulbuloñ kā shāḳh-e-gul par āshiyāñ qaa.em rahe

chāñd sūraj āsmāñ par jab talak raushan raheñ

gulshan-e-hindostāñ jannat-nishāñ qaa.em rahe

krishn kī bansī baje rādhā rahe madhuban rahe

pyaar ke naġhmoñ meñ Duubī vādī-e-gulshan rahe

chand aur tare salamat kahkashan qaem rahe

ye zamin qaem rahe ye aasman qaem rahe

ya ilahi desh mein amn-o-aman qaem rahe

raqs-e-hasti ke liye bazm-e-jahan qaem rahe

hashr tak qaem rahe mera chaman mera watan

aur is ki ye bahaar-e-jawedan qaem rahe

ya ilahi hashr tak mahken mere gulshan ke phul

bulbulon ka shaKH-e-gul par aashiyan qaem rahe

chand suraj aasman par jab talak raushan rahen

gulshan-e-hindostan jannat-nishan qaem rahe

krishn ki bansi baje radha rahe madhuban rahe

pyar ke naghmon mein Dubi wadi-e-gulshan rahe