chalo musafir

chalo musāfir, udaas shāmoñ kī rahguzar meñ

sitāre, DhūñDeñ

chhalaktī āñkhoñ meñ zindagī ke jo bach ga.e haiñ vo ḳhvāb DhūñDeñ

bhaTaktī galiyoñ meñ ābloñ ke gulāb dekheñ

pahāḌ sochoñ meñ sabz rañgoñ ke ḳhvāb dekheñ

chalo musāfir

nishān-e-manzil jo ḳhvāb sā hai, jo ārzuoñ kā hādsa hai

usī ke raste meñ kahkashā.eñ bikher deñ ham

baqā ke raste meñ ḳhema-zan haiñ, ḳhatā ke lashkar, fanā ke lashkar

chalo musāfir fanā ke ghar se

baqā kī manzil uThā ke lā.eñge

hikāyatoñ meñ haqīqatoñ kā mizāj bhar deñ

kisī ke ghar meñ

añdhere ghar meñ

charāġh rakh deñ

chhalaktī āñkhoñ meñ ḳhvāb rakh deñ

chalo musafir, udas shamon ki rahguzar mein

sitare, DhunDen

chhalakti aankhon mein zindagi ke jo bach gae hain wo KHwab DhunDen

bhaTakti galiyon mein aablon ke gulab dekhen

pahaD sochon mein sabz rangon ke KHwab dekhen

chalo musafir

nishan-e-manzil jo KHwab sa hai, jo aarzuon ka hadsa hai

usi ke raste mein kahkashaen bikher den hum

baqa ke raste mein KHema-zan hain, KHata ke lashkar, fana ke lashkar

chalo musafir fana ke ghar se

baqa ki manzil uTha ke laenge

hikayaton mein haqiqaton ka mizaj bhar den

kisi ke ghar mein

andhere ghar mein

charagh rakh den

chhalakti aankhon mein KHwab rakh den