dam aa nahin raha

dam aa nahīñ rahā

nafas nafas ghuTan qadam qadam thakan

jale hue par āsmāñ se gir rahe haiñ

kabāb ho ga.e haiñ kyā

parkāsh ke svapn dekhte parind

ThiThur rahe haiñ zamharīr murda ghar meñ do darāz jism

laboñ pe phīphaḌī bañdhī huī

utar rahā hai aañkh meñ safed motiyā

diloñ ke sag galī meñ bhauñkte haiñ

DhūñDhte haiñ dāman-āshnā musāfiroñ ke

sūñghte haiñ priit kī mahak

thakan se baiThte haiñ haar kar

kuredtī hai ḳhvāb kī chuḌail

qabr se nikāltī hai daaġh daaġh dhaḌ

kharochtī hai raat bhar kabūd jild

ye ḳhalfishār

jism ke ujaaḌ marġh-zār meñ kisī parind kī pukār

daraḳht Dheh chuke

sabhī pashū pakherū jā chuke

ye āḳhirī parinda kaun hai

humā yā maiñ

ye kaun haDDiyāñ chabā rahā hai

dil kā maas khā rahā hai

siina regzār

ġhamoñ ke añdhkār meñ aTe nagar

ye dil haiñ yā haiñ ret meñ dhañse hue khañDar

dam aa nahin raha

nafas nafas ghuTan qadam qadam thakan

jale hue par aasman se gir rahe hain

kabab ho gae hain kya

parkash ke swapn dekhte parind

ThiThur rahe hain zamharir murda ghar mein do daraaz jism

labon pe phiphaDi bandhi hui

utar raha hai aankh mein safed motiya

dilon ke sag gali mein bhaunkte hain

DhunDhte hain daman-ashna musafiron ke

sunghte hain prit ki mahak

thakan se baiThte hain haar kar

kuredti hai KHwab ki chuDail

qabr se nikalti hai dagh dagh dhaD

kharochti hai raat bhar kabud jild

ye KHalfishaar

jism ke ujaD margh-zar mein kisi parind ki pukar

daraKHt Dheh chuke

sabhi pashu pakheru ja chuke

ye aaKHiri parinda kaun hai

huma ya main

ye kaun haDDiyan chaba raha hai

dil ka mas kha raha hai

sina regzar

ghamon ke andhkar mein aTe nagar

ye dil hain ya hain ret mein dhanse hue khanDar