dehli

hamārī majlis-e-shūrā ke ūñche ūñche mahal

nazar jhukā.e jumūd-e-amal se sar bojhal

vo bebasī ki zarā aage baḌh nahīñ sakte

kitāb-e-vaqt kī tahrīr paḌh nahīñ sakte

bhaḌak rahe haiñ nigāhoñ ke sāmne shole

zabāñ na muñh meñ ho jis ke vo kis tarah bole

ye shahr-e-dillī bahisht-e-nazar jo thā kal tak

banā huā hai jahannam zamīñ se tā-ba-falak

siyāh-shole diloñ kī siyāhiyāñ le kar

uThe haiñ aaj vatan kī tabāhiyāñ le kar

makāñ ko ḳhud hī makīnoñ ne kar diyā barbād

miTā dī apne hī hāthoñ se satvat-e-ajdād

ḳhud apnī teġhoñ se apne hī gardaneñ kāTeñ

taḌaptī lāshoñ se nafrat kī ḳhandaqeñ pāTeñ

tamām shahr pe chhā.ī huī hai ik vahshat

nazar jhapakte hī kaisī badal ga.ī hālat

dukāneñ luT rahī haiñ goliyoñ kī bārish hai

siyāhkāroñ se ahl-e-duval kī sāzish hai

darinde dauḌte phirte haiñ saḌtī lāshoñ meñ

lahū se tar kiye nāḳhūn gosht dāñtoñ meñ

gharoñ kā haal to bāzār se bhī bad-tar hai

jidhar uThāo nazar zindagī mukaddar hai

jo luT chuke haiñ vo ghar saa.eñ saa.eñ karte haiñ

jo jal rahe haiñ abhī sard aaheñ bharte haiñ

nikal paḌe haiñ makānoñ ko chhoḌ kar shahrī

jab aabrū pe ban aa.ī to maut kī Thahrī

hazāroñ auratoñ kā aaj luT rahā hai suhāg

na jaane kitnī tamannāoñ meñ lagī hai aag

yatīm bachche bilakte haiñ godiyoñ ke liye

ġharīb shahr taraste haiñ roTiyoñ ke liye

ujaḌ ke kitne ma.ābid bane siyah-ḳhāne

jo aadmī ko na samjhā ḳhudā ko kyā jaane

ye haal dekh ke sakte meñ aa ga.ī hai fasīl

tamām qile kā maidāñ banā hai ḳhuun kī jhiil

bahā.e baiThī hai aañsū lahū ke chandni-chowk

karol-bagh ke dil meñ qaroliyoñ kī nok

purānī dilī se bhī baḌh ga.ī na.ī dillī

purāne qile meñ jā kar basī na.ī dillī

hazār baar ye bastī ujaḌ ujaḌ ke basī

hazār baar ye dillī bigaḌ bigaḌ ke banī

magar kuchh ab kī dafa is tarah ke charke haiñ

ki jitnī choTeñ haiñ utne hī dil ke TukḌe haiñ

ye juḌ to sakte haiñ lekin kahāñ hai vo marham

jo TuuTe rishtoñ ko qaumoñ ke kar de phir bāham

magar ye kaise ho jab chārasāz ḳhud lāchār

ilaaj kaun kare jab tabīb ḳhud bīmār

hamārī majlis-e-shūrā ke ūñche ūñche mahal

nazar jhukā.e jumūd-e-amal se sar bojhal

hamari majlis-e-shura ke unche unche mahal

nazar jhukae jumud-e-amal se sar bojhal

wo bebasi ki zara aage baDh nahin sakte

kitab-e-waqt ki tahrir paDh nahin sakte

bhaDak rahe hain nigahon ke samne shole

zaban na munh mein ho jis ke wo kis tarah bole

ye shahr-e-dilli bahisht-e-nazar jo tha kal tak

bana hua hai jahannam zamin se ta-ba-falak

siyah-shole dilon ki siyahiyan le kar

uThe hain aaj watan ki tabahiyan le kar

makan ko KHud hi makinon ne kar diya barbaad

miTa di apne hi hathon se satwat-e-ajdad

KHud apni teghon se apne hi gardanen kaTen

taDapti lashon se nafrat ki KHandaqen paTen

tamam shahr pe chhai hui hai ek wahshat

nazar jhapakte hi kaisi badal gai haalat

dukanen luT rahi hain goliyon ki barish hai

siyahkaron se ahl-e-duwal ki sazish hai

darinde dauDte phirte hain saDti lashon mein

lahu se tar kiye naKHun gosht danton mein

gharon ka haal to bazar se bhi bad-tar hai

jidhar uThao nazar zindagi mukaddar hai

jo luT chuke hain wo ghar saen saen karte hain

jo jal rahe hain abhi sard aahen bharte hain

nikal paDe hain makanon ko chhoD kar shahri

jab aabru pe ban aai to maut ki Thahri

hazaron auraton ka aaj luT raha hai suhag

na jaane kitni tamannaon mein lagi hai aag

yatim bachche bilakte hain godiyon ke liye

gharib shahr taraste hain roTiyon ke liye

ujaD ke kitne maabid bane siyah-KHane

jo aadmi ko na samjha KHuda ko kya jaane

ye haal dekh ke sakte mein aa gai hai fasil

tamam qile ka maidan bana hai KHun ki jhil

bahae baiThi hai aansu lahu ke chandni-chowk

karol-bagh ke dil mein qaroliyon ki nok

purani dili se bhi baDh gai nai dilli

purane qile mein ja kar basi nai dilli

hazar bar ye basti ujaD ujaD ke basi

hazar bar ye dilli bigaD bigaD ke bani

magar kuchh ab ki dafa is tarah ke charke hain

ki jitni choTen hain utne hi dil ke TukDe hain

ye juD to sakte hain lekin kahan hai wo marham

jo TuTe rishton ko qaumon ke kar de phir baham

magar ye kaise ho jab chaarasaz KHud lachaar

ilaj kaun kare jab tabib KHud bimar

hamari majlis-e-shura ke unche unche mahal

nazar jhukae jumud-e-amal se sar bojhal