dhanak

ek kuttā jhāḌiyoñ meñ lā-vāris nau-maulūd bachche kī hifāzat kar rahā thā

ek maañ apne nanhe bachche ke gaal par kājal kā Tiika lagā rahī thī

ek ma.asūm bachche kī uñglī pakaḌ kar ek būḌhā aur nā-bīnā shaḳhs

saḌak paar kar rahā thā

rāmish-o-rañg meñ Duubī huī barāt meñ hañdiyoñ ko apne saroñ par

mazdūr uThā.e hue the

merī āñkhoñ meñ aañsū the aur pālan-hār tū mujhe yaad aa rahā thā

dahī bilotī huī mushfiq maañ ke hoñToñ se shahd meñ gūñdhe hue

kajrī ke bol phuuT rahe the

sarkañDā haath meñ liye hue nañg-dhaḌañg charvāhā birhā kī taan lagā rahā thā

sūraj kī narm kirnoñ ke jhāle meñ dariyā kināre

sohnī bartan māñjh rahī thī

pūnam ke hiñDole par charḳha kāt.tī huī daadī maañ ko bachche DhūñD rahe the

merī āñkhoñ meñ aañsū the aur pālan-hār tū mujhe yaad aa rahā thā

fazā ke soup meñ dhuup ko pachhortī huī havā

mere khaprail meñ amrit uñDel ga.ī thī

gehūñ kī harī bāliyoñ raa.ī ke ujle bhūloñ sarsoñ kī niilī chunriyoñ

aur alsī kī niilī oḌhniyoñ ko dekh kar

mere abbā kī būḌhī āñkhoñ se jugnū girne lage the

nau-maulūd bachhḌe ke jism ko chāTtī huī gaa.e pahlū meñ ghaas liye khaḌī huī

merī amaañ ko kanakhiyoñ se dekh rahī thī

merī baajī apne hisse kā baasī daal bhaat bhūkī billī ko khilā rahī thī

merī āñkhoñ meñ aañsū the aur pālan-hār

tū mujhe yaad aa rahā thā

ek kutta jhaDiyon mein la-waris nau-maulud bachche ki hifazat kar raha tha

ek man apne nanhe bachche ke gal par kajal ka Tika laga rahi thi

ek masum bachche ki ungli pakaD kar ek buDha aur na-bina shaKHs

saDak par kar raha tha

ramish-o-rang mein Dubi hui baraat mein handiyon ko apne saron par

mazdur uThae hue the

meri aankhon mein aansu the aur palan-haar tu mujhe yaad aa raha tha

dahi biloti hui mushfiq man ke honTon se shahd mein gundhe hue

kajri ke bol phuT rahe the

sarkanDa hath mein liye hue nang-dhaDang charwaha birha ki tan laga raha tha

suraj ki narm kirnon ke jhaale mein dariya kinare

sohni bartan manjh rahi thi

punam ke hinDole par charKHa katti hui dadi man ko bachche DhunD rahe the

meri aankhon mein aansu the aur palan-haar tu mujhe yaad aa raha tha

faza ke soup mein dhup ko pachhorti hui hawa

mere khaprail mein amrit unDel gai thi

gehun ki hari baaliyon rai ke ujle bhulon sarson ki nili chunriyon

aur alsi ki nili oDhniyon ko dekh kar

mere abba ki buDhi aankhon se jugnu girne lage the

nau-maulud bachhDe ke jism ko chaTti hui gae pahlu mein ghas liye khaDi hui

meri aman ko kanakhiyon se dekh rahi thi

meri baji apne hisse ka basi dal bhat bhuki billi ko khila rahi thi

meri aankhon mein aansu the aur palan-haar

tu mujhe yaad aa raha tha