دیوالی

نور کے چشمے عنایت کر دئے ظلمات نے

زندگی کی ایک اک کلفت مٹانے کے لیے

صرف پل بھر کو غم جاناں بھلانے کے لیے

ہر برس آتی ہے دیوالی عجب انداز سے

لکشمی کا ہو رہا ہے پھر سے استقبال آج

صاف ستھری دودھ سے دھوئی ہر اک دیوار ہے

کونا کونا گوشہ گوشہ مطلع انوار ہے

ہو گئے افسردہ چہرے بھی خوشی سے لال آج

ہم توجہ دل کی دنیا کی طرف دیتے نہیں

پیار کے دو بول میٹھے بولنا چاہیں تو کیوں

دوسروں کے غم کی خاطر ہم بھریں آہیں تو کیوں

ہم چراغوں سے کبھی اک درس بھی لیتے نہیں

دھن کے متوالے ہیں ہم حرص و ہوس میں چور ہیں

اصل میں اپنی حقیقت ہی سے کوسوں دور ہیں