diwali

raat kuchh tārīk bhī hai aur kuchh raushan bhī hai

vaqt ke māthe pe shoḳhī bhī hai bholā-pan bhī hai

bām-o-dar par aaj miTTī ke diye haiñ is tarah

āsmānoñ par sitāre jagmagā.eñ jis tarah

rāstoñ par haiñ danā-dan kī sadā.eñ ḳhaufnāk

zindagī se maut goyā kar rahī hai tāk-jhāñk

ho rahī haiñ har galī-kūche meñ ātish-bāziyāñ

aar rahā hai abr kī sūrat tamavvul kā dhuāñ

kar rahe haiñ laxmī-pūjan bhī gharoñ meñ sāhūkār

dev daulat ko samajh baiThe haiñ rabb-e-iqtidār

hind vāloñ ko maraz hai nāravā taqlīd kā

aaj ghar meñ seTh-jī bhī khel lete haiñ juā

ho sake to chhoḌ de rasm-e-kohan mard-e-javāñ

tā-ba-kai dohrā.e jā.egā fasurda dāstāñ

aql se kuchh kaam le hindostāñ par rahm kar

aaj bhī lākhoñ gharoñ meñ hai añdhere kā guzar

hosh meñ aa ḳhvāb se bedār ho ai vaqf-e-naum

mulk par tere hukūmat kar rahī hai ġhair qaum

mard hai tū kaam le himmat se ronā chhoḌ de

naam le arjun kā zanjīr-e-ġhulāmī toḌ de

hind kī ḳhvābīda qismat ko jagānā chāhiye

shauq se phir tujh ko dīvālī manānā chāhiye

raat kuchh tarik bhi hai aur kuchh raushan bhi hai

waqt ke mathe pe shoKHi bhi hai bhola-pan bhi hai

baam-o-dar par aaj miTTi ke diye hain is tarah

aasmanon par sitare jagmagaen jis tarah

raston par hain dana-dan ki sadaen KHaufnak

zindagi se maut goya kar rahi hai tak-jhank

ho rahi hain har gali-kuche mein aatish-baziyan

aar raha hai abr ki surat tamawwul ka dhuan

kar rahe hain laxmi-pujan bhi gharon mein sahukar

dew daulat ko samajh baiThe hain rabb-e-iqtidar

hind walon ko maraz hai narawa taqlid ka

aaj ghar mein seTh-ji bhi khel lete hain jua

ho sake to chhoD de rasm-e-kohan mard-e-jawan

ta-ba-kai dohrae jaega fasurda dastan

aql se kuchh kaam le hindostan par rahm kar

aaj bhi lakhon gharon mein hai andhere ka guzar

hosh mein aa KHwab se bedar ho ai waqf-e-naum

mulk par tere hukumat kar rahi hai ghair qaum

mard hai tu kaam le himmat se rona chhoD de

nam le arjun ka zanjir-e-ghulami toD de

hind ki KHwabida qismat ko jagana chahiye

shauq se phir tujh ko diwali manana chahiye