diwangi

bahut kuchh chāhtā thā maiñ

hamesha chāhtā thā maiñ

ki duniyā ḳhūbsūrat ho

ki jaisī

pyaar karte vaqt hotī hai

chāhtā thā

shaam hote hī utar aa.e

falak se chāñd bachchoñ kī hathelī meñ

ki shab

tārīk ho jitnī magar

nam ho khanak ho

aur pūrab kī havā.eñ

subuk raftār guzreñ

chhatoñ par os ho

aur āñganoñ meñ kahkashāñ utre

hamesha chāhtā thā maiñ

ki aañsū hī nahīñ hoñ

aur agar hoñ to

vafūr-e-sar-kashī ke

zabāñ meñ koī luknat

aur hoñToñ meñ

koī larzish na ho hargiz

agar ho to

mohabbat kī tapish meñ

ḳhudāoñ kī tarah qādir

hamāre baap būḌhe hī na hoñ

aur apsarāoñ aur pariyoñ sī

hasīñ mahbūb maa.eñ

apne bachchoñ ko na ro.eñ

kisī bachche kī āñkhoñ meñ

kabhī vahshat na dar aa.e

koī duniyā se nā-mahram na guzre

javāñ hone se pahle saare bachche

bhaag jaa.eñ apne ghar se

aur duniyā.eñ basā.eñ

yā koī bachcha

kisī ghar se na bhāge

hamāre gaañv kī alhaḌ hasīna kī javānī

itnī jaldī to na guzre

bahut din bahut din aur

Thahre

aur jashn kī shab

jab bisāt-e-raqs qaa.em ho

raushnī bardār chehre bhī

munavvar hoñ

chāhtā thā ki jinheñ hone kā koī haq nahīñ thā

aise saare lafz bāhar hoñ

zabānoñ se hamārī

aur duniyā bhar ke saare log

shā.ir hoñ

hamesha chāhtā thā

baḌī ma.amūlī chīzeñ chāhtā thā maiñ

ki jaise chāhtā thā

saath ek laḌkī kā

sard yaḳh-basta havāoñ meñ

sharāre bharne vaalī

ek laḌkī

yā koī martūb mausam

yā ki shabnam meñ nahā.ī

sīḌhiyoñ se chāñd tak bhīgī huī ik raat

shab-e-sehrā

mulā.em garam-joshī se banī duniyā

halāvat aur hiddat se banī duniyā

sīna-e-shā.ir meñ ik maġhrūr parcham

ek laḌkī

ek duniyā

bahut ma.amūlī chīzeñ chāhtā thā maiñ

ki jaise chāhtā thā

zindagī meñ koī mausīqī koī naġhma

āshnā.ī dard ke mizrāb se

sard zindagī kā koī

barjasta tarāna

ek kamra aur bistar

ek rajā.ī

mez aur kursī

kitābeñ aur davā.eñ

dostoñ ke ḳhat

ek khiḌkī aur thoḌī chhat

thoḌī mastī aur be-ḳhaufī

maiñ ye bhī chāhtā thā

aur vo bhī chāhtā thā

maiñ sab kuchh chāhtā thā

bahut ma.amūlī chīzeñ chāhtā thā maiñ

bahut ma.amūlī chīzoñ par Tikī thī zindagī merī

mujhe afsos hai is kā

merī āñkhoñ ne dekhā thā

jahāñ ko

āriz-e-mahbūb kī sūrat

hamāre zehn meñ

har ḳhvāb kī tafsīl thī

har husn kā imkān thā

āsmāñ kuchh bhī nahīñ

ek khel kā maidān thā

bachchoñ kī ḳhātir

aur samundar mahz ek kāñch kī chādar

jise likhne kī ḳhātir

mez par rakhā gayā thā

vāqi.a to ye hai ki

duniyā

mire kamre se ziyāda

kuchh nahīñ thī

mujhe mālūm thā

ki phuul kis goshe meñ hoñge

qalam hogā kahāñ par

kis jagah kheleñge bachche

aur ḳhanjar

kis jagah hogā

bahut kuchh chahta tha main

hamesha chahta tha main

ki duniya KHubsurat ho

ki jaisi

pyar karte waqt hoti hai

chahta tha

sham hote hi utar aae

falak se chand bachchon ki hatheli mein

ki shab

tarik ho jitni magar

nam ho khanak ho

aur purab ki hawaen

subuk raftar guzren

chhaton par os ho

aur aanganon mein kahkashan utre

hamesha chahta tha main

ki aansu hi nahin hon

aur agar hon to

wafur-e-sar-kashi ke

zaban mein koi luknat

aur honTon mein

koi larzish na ho hargiz

agar ho to

mohabbat ki tapish mein

KHudaon ki tarah qadir

hamare bap buDhe hi na hon

aur apsaraon aur pariyon si

hasin mahbub maen

apne bachchon ko na roen

kisi bachche ki aankhon mein

kabhi wahshat na dar aae

koi duniya se na-mahram na guzre

jawan hone se pahle sare bachche

bhag jaen apne ghar se

aur duniyaen basaen

ya koi bachcha

kisi ghar se na bhage

hamare ganw ki alhaD hasina ki jawani

itni jaldi to na guzre

bahut din bahut din aur

Thahre

aur jashn ki shab

jab bisat-e-raqs qaem ho

raushni bardar chehre bhi

munawwar hon

chahta tha ki jinhen hone ka koi haq nahin tha

aise sare lafz bahar hon

zabanon se hamari

aur duniya bhar ke sare log

shair hon

hamesha chahta tha

baDi mamuli chizen chahta tha main

ki jaise chahta tha

sath ek laDki ka

sard yaKH-basta hawaon mein

sharare bharne wali

ek laDki

ya koi martub mausam

ya ki shabnam mein nahai

siDhiyon se chand tak bhigi hui ek raat

shab-e-sehra

mulaem garam-joshi se bani duniya

halawat aur hiddat se bani duniya

sina-e-shair mein ek maghrur parcham

ek laDki

ek duniya

bahut mamuli chizen chahta tha main

ki jaise chahta tha

zindagi mein koi mausiqi koi naghma

aashnai dard ke mizrab se

sard zindagi ka koi

barjasta tarana

ek kamra aur bistar

ek rajai

mez aur kursi

kitaben aur dawaen

doston ke KHat

ek khiDki aur thoDi chhat

thoDi masti aur be-KHaufi

main ye bhi chahta tha

aur wo bhi chahta tha

main sab kuchh chahta tha

bahut mamuli chizen chahta tha main

bahut mamuli chizon par Tiki thi zindagi meri

mujhe afsos hai is ka

meri aankhon ne dekha tha

jahan ko

aariz-e-mahbub ki surat

hamare zehn mein

har KHwab ki tafsil thi

har husn ka imkan tha

aasman kuchh bhi nahin

ek khel ka maidan tha

bachchon ki KHatir

aur samundar mahz ek kanch ki chadar

jise likhne ki KHatir

mez par rakha gaya tha

waqia to ye hai ki

duniya

mere kamre se ziyaada

kuchh nahin thi

mujhe malum tha

ki phul kis goshe mein honge

qalam hoga kahan par

kis jagah khelenge bachche

aur KHanjar

kis jagah hoga