dilase teri yaadon ke

kahīñ anjān sāhil par kahīñ sunsān rāhoñ meñ

Dhale haiñ qahqahe mere 'safī' jab sard aahoñ meñ

to in vīrān āñkhoñ meñ diyā ummīd kā ban kar

mirī tārīk qismat ko hamesha jagmagāte haiñ

dilāse terī yādoñ ke

sahar kī tābnākī meñ yahī gul haiñ yahī ḳhushbū

añdherī raat meñ taare bane haiñ vo kabhī jugnū

mire man meñ utarte haiñ kabhī naġhmāt kī sūrat

hazāroñ rang se aa kar mire dil ko lubhāte haiñ

dilāse terī yādoñ ke

kahīñ vo shak kī dhartī se yaqīñ ban kar ubharte haiñ

kahīñ palkoñ se ashkoñ ke vo motī ban ke girte haiñ

kahīñ āvārgī meñ ham-safīr o ham-safar mere

kahīñ ḳhvāboñ kī duniyā meñ mujhe vo gungunāte haiñ

dilāse terī yādoñ ke

kabhī vo chāñd kī sūrat kabhī vo kahkashāñ ban kar

kabhī sūraj kī tarh raushnī ke tarjumāñ ban kar

mujhe vo tīrgī meñ manziloñ kī rah dikhāte haiñ

shab-e-tārīk meñ tāroñ kī tarh TimTimāte haiñ

dilāse terī yādoñ ke

kabhī patjhaḌ kī shāmoñ meñ kabhī pur-kaif sāvan meñ

kabhī ūñche pahāḌoñ par kabhī vaadī ke dāman meñ

kabhī dariyā kī maujoñ par khī sahrā kī vus'at meñ

parindoñ kī tarah shāḳh-e-nazar par chahchahāte haiñ

dilāse terī yādoñ ke

yahī ummīd kā markaz yahī haiñ soch kā mehvar

sajī rahtī hai un hī se mirī mahfil yūñhī shab bhar

maiñ tanhā huuñ ye tanhā.ī meñ aksar bhuul jaatā huuñ

'safī' is taur se aa kar gale mujh ko lagāte haiñ

kahin anjaan sahil par kahin sunsan rahon mein

Dhale hain qahqahe mere 'safi' jab sard aahon mein

to in viran aankhon mein diya ummid ka ban kar

meri tarik qismat ko hamesha jagmagate hain

dilase teri yaadon ke

sahar ki tabnaki mein yahi gul hain yahi KHushbu

andheri raat mein tare bane hain wo kabhi jugnu

mere man mein utarte hain kabhi naghmat ki surat

hazaron rang se aa kar mere dil ko lubhate hain

dilase teri yaadon ke

kahin wo shak ki dharti se yaqin ban kar ubharte hain

kahin palkon se ashkon ke wo moti ban ke girte hain

kahin aawargi mein ham-safir o ham-safar mere

kahin KHwabon ki duniya mein mujhe wo gungunate hain

dilase teri yaadon ke

kabhi wo chand ki surat kabhi wo kahkashan ban kar

kabhi suraj ki tarh raushni ke tarjuman ban kar

mujhe wo tirgi mein manzilon ki rah dikhate hain

shab-e-tarik mein taron ki tarh TimTimate hain

dilase teri yaadon ke

kabhi patjhaD ki shamon mein kabhi pur-kaif sawan mein

kabhi unche pahaDon par kabhi wadi ke daman mein

kabhi dariya ki maujon par khi sahra ki wus'at mein

parindon ki tarah shaKH-e-nazar par chahchahate hain

dilase teri yaadon ke

yahi ummid ka markaz yahi hain soch ka mehwar

saji rahti hai un hi se meri mahfil yunhi shab bhar

main tanha hun ye tanhai mein aksar bhul jata hun

'safi' is taur se aa kar gale mujh ko lagate hain