doshiza malan

lo pau phaTī vo chhup ga.ī tāroñ kī anjuman

lo jām-e-mahr se vo chhalakne lagī kiran

khichne lagā nigāh meñ fitrat kā bāñkpan

jalve zamīñ pe barse zamīñ ban ga.ī dulhan

gūñje tarāne sub.h kā ik shor ho gayā

aalam mai-e-baqā meñ sharābor ho gayā

phūlī shafaq fazā meñ hinā tilmilā ga.ī

ik mauj-e-rañg kaañp ke aalam pe chhā ga.ī

kul chāñdnī simaT ke guloñ meñ samā ga.ī

zarre bane nujūm zamīñ jagmagā ga.ī

chhoḌā sahar ne tīrgi-e-shab ko kaaT ke

uḌne lagī havā meñ kiran os chaaT ke

machlī jabīn-e-sharq pe is tarah mauj-e-nūr

lahrā ke tairne lagī aalam meñ barq-e-tūr

uḌne lagī shamīm chhalakne lagā surūr

khilne lage shagūfe chahakne lage tuyūr

jhoñke chale havā ke shajar jhūmne lage

mastī meñ phuul kāñToñ kā muñh chūmne lage

tham tham ke zau-fishāñ huā zarroñ pe āftāb

chhiḌkā havā ne sabza-e-ḳhvābīda par gulāb

murjhā.ī pattiyoñ meñ machalne lagā shabāb

larzish huī guloñ ko barasne lagī sharāb

rindān-e-mast aur bhī sarmast ho ga.e

tharrā ke hoñT jaam meñ paivast ho ga.e

doshīza ek ḳhush-qad o ḳhush-rañg-o-ḳhūb-rū

mālan kī nūr-dīda gulistāñ kī aabrū

mahkā rahī hai phūloñ se dāmān-e-ārzū

tiflī liye hai god meñ tūfān-e-rañg-o-bū

rañgīniyoñ meñ khelī guloñ meñ palī huī

nauras kalī meñ qaus-e-quzah hai Dhalī huī

mastī meñ ruḳh pe baal pareshāñ kiye hue

bādal meñ sham-e-tūr farozāñ kiye hue

har samt naqsh-e-pā se charāġhāñ kiye hue

āñchal ko bār-e-gul se gulistāñ kiye hue

lahrā rahī hai bād-e-sahar paañv chuum ke

phirtī hai tītarī sī ġhazab jhuum jhuum ke

zulfoñ meñ tāb-e-sumbul-e-pechāñ liye hue

aariz meñ shoḳh rañg-e-gulistāñ liye hue

āñkhoñ meñ rūh-e-bāda-e-irfāñ liye hue

hoñToñ meñ āb-e-la.al-e-badaḳhshāñ liye hue

fitrat ne tol tol ke chashm-e-qubūl meñ

saarā chaman nichoḌ diyā ek phuul meñ

ai hūr-e-bāġh itnī ḳhudī se na kaam le

uḌ kar shamīm-e-gul kahīñ āñchal na thaam le

kaliyoñ kā le payām sahar kā salām le

'kaifī' se husn-e-dost kā taaza kalām le

shā.er kā dil hai muft meñ kyuuñ dard-mañd ho

ik gul idhar bhī nazm agar ye pasand ho

lo pau phaTi wo chhup gai taron ki anjuman

lo jam-e-mahr se wo chhalakne lagi kiran

khichne laga nigah mein fitrat ka bankpan

jalwe zamin pe barse zamin ban gai dulhan

gunje tarane subh ka ek shor ho gaya

aalam mai-e-baqa mein sharabor ho gaya

phuli shafaq faza mein hina tilmila gai

ek mauj-e-rang kanp ke aalam pe chha gai

kul chandni simaT ke gulon mein sama gai

zarre bane nujum zamin jagmaga gai

chhoDa sahar ne tirgi-e-shab ko kaT ke

uDne lagi hawa mein kiran os chaT ke

machli jabin-e-sharq pe is tarah mauj-e-nur

lahra ke tairne lagi aalam mein barq-e-tur

uDne lagi shamim chhalakne laga surur

khilne lage shagufe chahakne lage tuyur

jhonke chale hawa ke shajar jhumne lage

masti mein phul kanTon ka munh chumne lage

tham tham ke zau-fishan hua zarron pe aaftab

chhiDka hawa ne sabza-e-KHwabida par gulab

murjhai pattiyon mein machalne laga shabab

larzish hui gulon ko barasne lagi sharab

rindan-e-mast aur bhi sarmast ho gae

tharra ke honT jam mein paiwast ho gae

doshiza ek KHush-qad o KHush-rang-o-KHub-ru

malan ki nur-dida gulistan ki aabru

mahka rahi hai phulon se daman-e-arzu

tifli liye hai god mein tufan-e-rang-o-bu

ranginiyon mein kheli gulon mein pali hui

nauras kali mein qaus-e-quzah hai Dhali hui

masti mein ruKH pe baal pareshan kiye hue

baadal mein sham-e-tur farozan kiye hue

har samt naqsh-e-pa se charaghan kiye hue

aanchal ko bar-e-gul se gulistan kiye hue

lahra rahi hai baad-e-sahar panw chum ke

phirti hai titari si ghazab jhum jhum ke

zulfon mein tab-e-sumbul-e-pechan liye hue

aariz mein shoKH rang-e-gulistan liye hue

aankhon mein ruh-e-baada-e-irfan liye hue

honTon mein aab-e-lal-e-badaKHshan liye hue

fitrat ne tol tol ke chashm-e-qubul mein

sara chaman nichoD diya ek phul mein

ai hur-e-bagh itni KHudi se na kaam le

uD kar shamim-e-gul kahin aanchal na tham le

kaliyon ka le payam sahar ka salam le

'kaifi' se husn-e-dost ka taza kalam le

shaer ka dil hai muft mein kyun dard-mand ho

ek gul idhar bhi nazm agar ye pasand ho