dost ruKHsat ho gae

dost ruḳhsat ho ga.e

un se mulāqāteñ ga.iiñ bāteñ ga.iiñ

shahar thā ābād jin ke dam-qadam se

vo hamārī chāñdnī rāteñ ga.iiñ

marne vaale mar ga.e

zinda magar ham bhī nahīñ

vo to ġhusl-e-āḳhirī le kar hue phir tāzgī se āshnā

nithre suthre oḌh kar apnī safedī ke kafan

kāfūr kī ḳhushbū ko nathunoñ meñ samā.e

so ga.e ārām se ThanDe badan

apnī apnī qabr par takiya kiye

vo thakan kī is musalsal sarsarāhaT se to ab āzād haiñ

saañs kī zanjīr se laTke hue

jāgte rahne kī kāvish aur lagan

is tag-o-dau se pare ābād haiñ

aur ham

jo is kināre par khaḌe

roz-o-shab lahroñ kā karte haiñ shumār

āp-bītī roz sunte haiñ

magar ḳhāmosh haiñ

ḳhāmushī se bahtā paanī

roz bahtā dekhte haiñ

Duub jaane kī magar himmat nahīñ

kaun jaane Duub hī jaa.eñ kahīñ

Duub jaao yā chale aao idhar

baaz aao aur phir zinda raho

sātvāñ dar bhī khulā hai muntazir

dāġh-e-hijrat de ga.e ḳhushbū ke phuul

kaun ab ban kar charāġh-e-rāh tum ko

haath se uñglī pakaḌ kar

tifl-e-maktab kī tarah le kar baḌhe

aur ye kahe

maut kā lamha hamārī zindagī kā aa gayā

jism kī ThanDak to dastak de rahī hai

aao kuchh bāteñ kareñ

aur phir chaleñ

dost ruḳhsat ho ga.e

dost ruKHsat ho gae

un se mulaqaten gain baaten gain

shahar tha aabaad jin ke dam-qadam se

wo hamari chandni raaten gain

marne wale mar gae

zinda magar hum bhi nahin

wo to ghusl-e-aKHiri le kar hue phir tazgi se aashna

nithre suthre oDh kar apni safedi ke kafan

kafur ki KHushbu ko nathunon mein samae

so gae aaram se ThanDe badan

apni apni qabr par takiya kiye

wo thakan ki is musalsal sarsarahaT se to ab aazad hain

sans ki zanjir se laTke hue

jagte rahne ki kawish aur lagan

is tag-o-dau se pare aabaad hain

aur hum

jo is kinare par khaDe

roz-o-shab lahron ka karte hain shumar

aap-biti roz sunte hain

magar KHamosh hain

KHamushi se bahta pani

roz bahta dekhte hain

Dub jaane ki magar himmat nahin

kaun jaane Dub hi jaen kahin

Dub jao ya chale aao idhar

baz aao aur phir zinda raho

satwan dar bhi khula hai muntazir

dagh-e-hijrat de gae KHushbu ke phul

kaun ab ban kar charagh-e-rah tum ko

hath se ungli pakaD kar

tifl-e-maktab ki tarah le kar baDhe

aur ye kahe

maut ka lamha hamari zindagi ka aa gaya

jism ki ThanDak to dastak de rahi hai

aao kuchh baaten karen

aur phir chalen

dost ruKHsat ho gae