dukhti haDDiyon ki wakalat

dikhtī haDDiyāñ kahtī hai ārām karo ab

dil kahtā hai abhī nahīñ abhī to kaam paḌā hai sab

magar ek aur hī bolī boltā hai dimāġh

pahle kaun sā tiir maar liyā thā aap ne jo ab phir chale haiñ jauhar dikhāne

sarau.Te kā don khote aur sarshār kā ḳhudā.ī faujdārī bhī

taḌapte hoñge qabr meñ paḌe paḌe

aap kī be-qarāriyāñ dekh kar

duniyā hī to badal Daalī aap ne apnī tahrīroñ aur taqrīroñ se

aur kyā kahne haiñ aap kī siyāsat ke

sotoñ ko jagā diyā aap ne

zer-dastoñ ko uThā diyā zabardastoñ ko girā diyā aap ne

sach-much kā inqilāb hī to barpā kar ke rakh diyā aap ne

chhoḌ jaane dījiye bahut ho ga.ī janāb

sunahre harfoñ meñ likhā jā chukā hai aap kā naam an-likhī tārīḳh meñ

aap vo hero haiñ koī giit nahīñ gaatā jis ke

vo gumnām sipāhī haiñ jise sirf

āsmān kī aañkh ne dekhā hotā hai dād-e-shujā.at dete

agar aap ke hāthoñ vāqa.ī koī achchhā kaam sarzad ho gayā thā to

yaqīnan patā hogā us kā ḳhudā ko

vo is kā zarūr ajr degā aap ko

aur sabr se baḌh kar kyā ho saktā hai ajr

sabr kījiye zarā

dukhtī haDDiyoñ kī bhī sun lījiye zarā

is ḳhāna-ḳharāb-e-dil kī maan kar hī to aap hue haiñ ḳhāna-ḳharāb

hamesha bahkāyā hai us ne aap ko

ġhalat-salat rāstoñ par chalāyā hai aap ko

jahāñ chup rahne meñ maslahat thī vahāñ bolne par uksāyā hai aap ko

jab haath baḌhā kar jaam uThāne kā vaqt thā to

inkisārī ke chakkar meñ phañsāyā hai aap ko

zarā apne badan se pochhiye apnī umr aur phir pūchh kar dekhiye dil se

aap sattar ke haiñ nā magar badan kahe gā saal

aur dil batā.egā chālīs saal

is dil par ḳhuun kī gulābī ne

huliya bigāḌ kar rakh diyā hai achchhe-bhale insān kā

paḌhe-likkhe sharīf aadmī ko dhakel diyā hai

siyāsat ke qassāb-ḳhāne meñ

bha.ī jis kā kaam usī ko saaje aur kare to Theñgā baaje

aap kyuuñ pareshān hote haiñ har barī ḳhabar par

vaise kabhī ḳhair kī ḳhabar bhī aa.ī hai vatan-e-azīz se

yaad nahīñ rahā aap ke to murshid bhī kahte the baar baar

vo kaam hamārī zimmedārī nahīñ hotā jis kī anjām-dahī kā sāmān na de ḳhudā

umar-fārūq ko zeb detā thā fikrmand honā

furāt ke kināre bhuuk se mar jaane vaale kutte ke liye

is liye ki vo the ḳhalīfa-a-vaqt

to kan meñ ḳhvāh-maḳhvāh

aap to kotvāl bhī nahīñ kisī shahr ke

aur chale haiñ puure malak kī fikr karne

balki saarī insāniyat kā ġham paal rakhā hai aap ne to

maiñ ne pahle bhī kahā shā.iroñ kī bak bak na sunā kareñ aap ziyāda

ba-qaul-e-ḳhudā vo to aadī haiñ ġhalat-bayānī ke

haahā kāñTā chubhe kisī ko taḌapte haiñ ham amiir saare jahāñ kā dard hamāre jigar meñ hai

aap ko auroñ kī paḌī haiñ pahle apnī to nabeḌ leñ aap

charity begins at home janāb

aa.iye sukūn se baiThe do ghaḌī

ziyāda der khaḌe rahne se aur baḌh jā.egā ghuTne kā dard

kyā ḳhayāl hai sabz chaa.e ke baare meñ

yā phir pī lījiye ThanDā mīThā rūh-afzā

siine āsmānī mausīqī baaḳh aur motzārT kī

Dhīlā chhoḌiye zarā a.asāb ko

so jā.iye so jā.iye niiñd aa jaa.e agar

lorī duuñ aap ko

rāt-din gardish meñ haiñ saat āsmāñ

ho rahegā kuchh na kuchh ghabrā.eñ kyā

dikhti haDDiyan kahti hai aaram karo ab

dil kahta hai abhi nahin abhi to kaam paDa hai sab

magar ek aur hi boli bolta hai dimagh

pahle kaun sa tir mar liya tha aap ne jo ab phir chale hain jauhar dikhane

sarauTe ka don khote aur sarshaar ka KHudai faujdari bhi

taDapte honge qabr mein paDe paDe

aap ki be-qarariyan dekh kar

duniya hi to badal Dali aap ne apni tahriron aur taqriron se

aur kya kahne hain aap ki siyasat ke

soton ko jaga diya aap ne

zer-daston ko uTha diya zabardaston ko gira diya aap ne

sach-much ka inqilab hi to barpa kar ke rakh diya aap ne

chhoD jaane dijiye bahut ho gai janab

sunahre harfon mein likha ja chuka hai aap ka nam an-likhi tariKH mein

aap wo hero hain koi git nahin gata jis ke

wo gumnam sipahi hain jise sirf

aasman ki aankh ne dekha hota hai dad-e-shujaat dete

agar aap ke hathon waqai koi achchha kaam sarzad ho gaya tha to

yaqinan pata hoga us ka KHuda ko

wo is ka zarur ajr dega aap ko

aur sabr se baDh kar kya ho sakta hai ajr

sabr kijiye zara

dukhti haDDiyon ki bhi sun lijiye zara

is KHana-KHarab-e-dil ki man kar hi to aap hue hain KHana-KHarab

hamesha bahkaya hai us ne aap ko

ghalat-salat raston par chalaya hai aap ko

jahan chup rahne mein maslahat thi wahan bolne par uksaya hai aap ko

jab hath baDha kar jam uThane ka waqt tha to

inkisari ke chakkar mein phansaya hai aap ko

zara apne badan se pochhiye apni umr aur phir puchh kar dekhiye dil se

aap sattar ke hain na magar badan kahe ga sal

aur dil bataega chaalis sal

is dil par KHun ki gulabi ne

huliya bigaD kar rakh diya hai achchhe-bhale insan ka

paDhe-likkhe sharif aadmi ko dhakel diya hai

siyasat ke qassab-KHane mein

bhai jis ka kaam usi ko saje aur kare to Thenga baje

aap kyun pareshan hote hain har bari KHabar par

waise kabhi KHair ki KHabar bhi aai hai watan-e-aziz se

yaad nahin raha aap ke to murshid bhi kahte the bar bar

wo kaam hamari zimmedari nahin hota jis ki anjam-dahi ka saman na de KHuda

umar-faruq ko zeb deta tha fikrmand hona

furaat ke kinare bhuk se mar jaane wale kutte ke liye

is liye ki wo the KHalifa-a-waqt

to kan mein KHwah-maKHwah

aap to kotwal bhi nahin kisi shahr ke

aur chale hain pure malak ki fikr karne

balki sari insaniyat ka gham pal rakha hai aap ne to

main ne pahle bhi kaha shairon ki bak bak na suna karen aap ziyaada

ba-qaul-e-KHuda wo to aadi hain ghalat-bayani ke

haha kanTa chubhe kisi ko taDapte hain hum amir sare jahan ka dard hamare jigar mein hai

aap ko auron ki paDi hain pahle apni to nabeD len aap

charity begins at home janab

aaiye sukun se baiThe do ghaDi

ziyaada der khaDe rahne se aur baDh jaega ghuTne ka dard

kya KHayal hai sabz chae ke bare mein

ya phir pi lijiye ThanDa miTha ruh-afza

sine aasmani mausiqi baKH aur motzarT ki

Dhila chhoDiye zara aasab ko

so jaiye so jaiye nind aa jae agar

lori dun aap ko

raat-din gardish mein hain sat aasman

ho rahega kuchh na kuchh ghabraen kya