دور بہت دور انسان شاہراہِ ارتقا پر

اے گردش ایام بس اب روک نہ مجھ کو

اے کاوش انجام بس اب روک نہ مجھ کو

اے لغزش ہر گام بس اب روک نہ مجھ کو

جانا ہے مجھے دور بہت دور بہت دور

سرمایہ و سازش کے فریبوں سے گزر کر

ہنگامہ و شورش کے فریبوں سے گزر کر

ہر منطق و دانش کے فریبوں سے گزر کر

جانا ہے مجھے دور بہت دور بہت دور

وہ جنت شداد ہو یا آتش نمرود

ہر منزل موہوم نہیں منزل مقصود

کامل ہے اگر شوق تو راہیں نہیں مسدود

جانا ہے مجھے دور بہت دور بہت دور

خار و خس و خاشاک کی دنیا سے بھی آگے

مہر و مہ و افلاک کی دنیا سے بھی آگے

تخئیل کی ادراک کی دنیا سے بھی آگے

جانا ہے مجھے دور بہت دور بہت دور