احتساب

مجھے بتاؤ اے علم والو

خدا کے محبوب کی محبت کا دم بھرو گے تو کیا ملے گا

کہ اس کی امت ہزار فرقوں میں بٹ رہی ہے

منافقوں شر پسند قوموں کے ہاتھ سے آج

کٹ رہی ہے

تم اپنے اپنے اصول لے کر کھڑے ہوئے ہو

کیوں اپنے اپنے اصول لے کر کھڑے ہوئے ہو

خدا را یہ تفرقہ مٹا دو

جو مردہ دل ہیں انہیں جلا دو

یہ پیروکار نیاز منداں

یہ سب تو معصوم و نابلد ہیں

جو رہبری میں تمہاری چل کر سمجھ رہے ہیں

کہ مستند ہیں

جو ہو سکے تو انہیں بچا لو

فشار ظلمات سے نکالو

انہیں حقیقت کی روشنی دو

اجاڑ آنکھوں میں خواب رکھ دو

تمہارے ہی اتحاد سے انتشار مٹنے کی ہیں امیدیں

تم اتحادی بناؤ ان کو

تم اتفاقی بناؤ ان کو

یہی بس اک حل ہے مسئلے کا

وگرنہ دیکھو گے روز محشر

تمہاری دامن کشائی ہوگی

ان ہی کی جانب خدا رہے گا

ان ہی کی جانب یہ دیکھنا

مصطفائی ہوگی