ek dhundli yaad

bārisheñ us ke badan par

zor se girtī rahīñ

aur vo bhīgī qabā meñ

der tak chaltī rahī

surḳh thā us kā badan

aur surḳh thī us kī qabā

surḳh thī us dam havā

bārishoñ meñ jañgaloñ ke darmiyāñ chalte ho

bhīgte chehre ko yā us kī qabā ko dekhte

baañs ke gunjān rastoñ pe kabhī baḌhte hue

us kī bhīgī aañkh meñ khultī dhanak takte hue

aur kabhī pīpal ke gahre surḳh sāyoñ ke tale

us ke bhīge hoñT pe kuchh titliyāñ rakhte hue

bārishoñ meñ bhīgte lamhe use bhī yaad haiñ

yaad haiñ us ko bhī hoñToñ pe sajī kuchh titliyāñ

yaad hai mujh ko bhī us kī aañkh meñ khultī dhanak

barishen us ke badan par

zor se girti rahin

aur wo bhigi qaba mein

der tak chalti rahi

surKH tha us ka badan

aur surKH thi us ki qaba

surKH thi us dam hawa

barishon mein jangalon ke darmiyan chalte ho

bhigte chehre ko ya us ki qaba ko dekhte

bans ke gunjaan raston pe kabhi baDhte hue

us ki bhigi aankh mein khulti dhanak takte hue

aur kabhi pipal ke gahre surKH sayon ke tale

us ke bhige honT pe kuchh titliyan rakhte hue

barishon mein bhigte lamhe use bhi yaad hain

yaad hain us ko bhi honTon pe saji kuchh titliyan

yaad hai mujh ko bhi us ki aankh mein khulti dhanak