ek gharib laDki ka KHwab

roz-afzūñ ye dekhtī huuñ maiñ

mere ḳhvāboñ meñ koī aatā hai

duur hī duur se vo merī taraf

dekh kar muskurā.e jaatā hai

ajnabī shaḳhs dilrubā jaisā

paas aa kar ke kuchh nahīñ kahtā

jaag uThtā hai dil kā ik taarā

mere ḳhvāboñ meñ jab vo aatā hai

hasratoñ ke mazār par jhuk kar

ārizoñ ke diye jalātā hai

āñkhoñ āñkhoñ meñ baat hotī hai

raqs meñ kā.enāt hotī hai

zindagī kī hasīn vaadī meñ

pyār-o-ulfat ke phuul khilte haiñ

apnī qadroñ kā vāsta de kar

ham gale se gale jo milte haiñ

nik.hatoñ kā salām aatā hai

zindagī kā payām aatā hai

jāñ-fazā dil-navāz ye lamhe

chāhtī huuñ ki jāvedāñ ho jaa.eñ

tham ke rah jaa.e vaqt kī raftār

aur din-rāt be-nishāñ ho jaa.eñ

bazm-e-hastī dhuāñ dhuāñ ho jaa.e

jo na ho jo ho be-gumāñ ho jaa.e

mujh ko ma.alūm hai magar ye bhī

mere ḳhvāboñ kī kuchh nahīñ ta.abīr

phir bhī itnā mujhe batā.e kaun

log kyoñ ho ga.e havas ke asiir

is se zyāda kare bhī kyā takrār

ek muflis kī duḳhtar-e-lāchār

roz-afzun ye dekhti hun main

mere KHwabon mein koi aata hai

dur hi dur se wo meri taraf

dekh kar muskurae jata hai

ajnabi shaKHs dilruba jaisa

pas aa kar ke kuchh nahin kahta

jag uThta hai dil ka ek tara

mere KHwabon mein jab wo aata hai

hasraton ke mazar par jhuk kar

aarizon ke diye jalata hai

aankhon aankhon mein baat hoti hai

raqs mein kaenat hoti hai

zindagi ki hasin wadi mein

pyar-o-ulfat ke phul khilte hain

apni qadron ka wasta de kar

hum gale se gale jo milte hain

nikhaton ka salam aata hai

zindagi ka payam aata hai

jaan-faza dil-nawaz ye lamhe

chahti hun ki jawedan ho jaen

tham ke rah jae waqt ki raftar

aur din-raat be-nishan ho jaen

bazm-e-hasti dhuan dhuan ho jae

jo na ho jo ho be-guman ho jae

mujh ko malum hai magar ye bhi

mere KHwabon ki kuchh nahin tabir

phir bhi itna mujhe batae kaun

log kyon ho gae hawas ke asir

is se zyaada kare bhi kya takrar

ek muflis ki duKHtar-e-lachaar