ek lambi kafir laDki

vaadī kī sab se lambī laḌkī ke jism ke sab masāmoñ se

resham se zyāda mulā.em aur narm ḳhamoshī meñ

ghanTiyoñ kī āvāzeñ aa rahī thiiñ

barkhā kī us nam-zada raat meñ

jab us ke jism pe qaus-e-quzah chamkī

to ghanTiyāñ tez tez bajne lagīñ

mire kānoñ meñ āhaTeñ aa rahī thiiñ

dhund se bhī narm aur mulā.em bādaloñ kī dabe paañv āhaTeñ

vo jab resham ke kachche tāroñ se banī huī

raat ke farsh par leTī

to qaus-e-quzah aur bhī shoḳh aur garm rañgoñ meñ Dhalne lagī

vo saiñkaḌoñ rañgoñ se murattab-shuda laḌkī

raat ga.e tak garm rañgoñ meñ pighaltī ga.ī

sub.h hone par sūraj kī pahlī kiran

rauzan se kamre meñ dāḳhil huī

to us ke jism se

raat kī ḳhvābīda ghanTiyoñ kī āvāzeñ sun kar

aur us ke jism pe so.e hue garm rañgoñ ko dekh kar

ek dam sharmā ga.ī

vaadī kī sab se lambī laḌkī

dhund se bhī narm aur resham se mulā.em

wadi ki sab se lambi laDki ke jism ke sab masamon se

resham se zyaada mulaem aur narm KHamoshi mein

ghanTiyon ki aawazen aa rahi thin

barkha ki us nam-zada raat mein

jab us ke jism pe qaus-e-quzah chamki

to ghanTiyan tez tez bajne lagin

mere kanon mein aahaTen aa rahi thin

dhund se bhi narm aur mulaem baadalon ki dabe panw aahaTen

wo jab resham ke kachche taron se bani hui

raat ke farsh par leTi

to qaus-e-quzah aur bhi shoKH aur garm rangon mein Dhalne lagi

wo sainkaDon rangon se murattab-shuda laDki

raat gae tak garm rangon mein pighalti gai

subh hone par suraj ki pahli kiran

rauzan se kamre mein daKHil hui

to us ke jism se

raat ki KHwabida ghanTiyon ki aawazen sun kar

aur us ke jism pe soe hue garm rangon ko dekh kar

ek dam sharma gai

wadi ki sab se lambi laDki

dhund se bhi narm aur resham se mulaem