ek minar gira

'azmat-e-ādam-e-ḳhākī kā parastār girā

ek mīnār girā

jis kī tanvīr ne zarroñ ko 'atā kī tābish

jis kī taqrīr ne toḌā hai tilism-e-zar-o-sīm

jis kī tahrīr ne ik ḳhvāb bunā ḳhvāb-e-sahar

jis kī tā'bīr meñ ik qaum uThī qaum-e-'azīm

vahī sardār vahī qāfila-sālār girā

ek mīnār girā

jis ne farsūda rivāyāt ke aivānoñ meñ

mehnat-o-jashn-e-musāvāt ke parcham lahrā.e

jabr-o-bedād-o-ġhulāmī ke siyah-ḳhānoñ meñ

tābish-e-hurriyat-e-fikr ke fānūs jalā.e

paikar-e-nūr nahīñ ḳhāliq-e-anvār girā

ek mīnār girā

jis ne auhām pe dānish kī kamandeñ Dālīñ

jis kī āvāz pe tūfān biphar jaate the

naazī afvāj ke sailāb ko moḌā jis ne

ġhaiz se jis ke shahanshāh bhī tharrāte the

amn kā koh-e-girāñ sulh kā shahkār girā

ek mīnār girā

apne hāthoñ meñ liye raḳhsh-e-baġhāvat kī 'ināñ

uThā āñdhī kī tarah abr kī sūrat barsā

ab koī puuje na puuje ye likhā jā.egā

amn-o-insāf o musāvāt kā vo devtā thā

de ke manzil kā nishāñ kārvāñ-sālār girā

ek mīnār girā

'azmat-e-adam-e-KHaki ka parastar gira

ek minar gira

jis ki tanwir ne zarron ko 'ata ki tabish

jis ki taqrir ne toDa hai tilism-e-zar-o-sim

jis ki tahrir ne ek KHwab buna KHwab-e-sahar

jis ki ta'bir mein ek qaum uThi qaum-e-'azim

wahi sardar wahi qafila-salar gira

ek minar gira

jis ne farsuda riwayat ke aiwanon mein

mehnat-o-jashn-e-musawat ke parcham lahrae

jabr-o-bedad-o-ghulami ke siyah-KHanon mein

tabish-e-hurriyat-e-fikr ke fanus jalae

paikar-e-nur nahin KHaliq-e-anwar gira

ek minar gira

jis ne auham pe danish ki kamanden Dalin

jis ki aawaz pe tufan biphar jate the

nazi afwaj ke sailab ko moDa jis ne

ghaiz se jis ke shahanshah bhi tharraate the

amn ka koh-e-giran sulh ka shahkar gira

ek minar gira

apne hathon mein liye raKHsh-e-baghawat ki 'inan

uTha aandhi ki tarah abr ki surat barsa

ab koi puje na puje ye likha jaega

amn-o-insaf o musawat ka wo dewta tha

de ke manzil ka nishan karwan-salar gira

ek minar gira