ek tashwish

kabhī kabhī jo tirī yaad aane lagtī hai

to sochtā huuñ ki phir se sadā.eñ duuñ tujh ko

is aas meñ ki mirī muztarib sadā sun kar

tū ek baar palaT kar ke dekh le jānāñ

ki kis tarah tire ġham ke 'azāb kā maarā

tirī nazar ke liye rāt-din taḌaptā hai

ki kis tarah tirī bāñhoñ kī dūriyāñ mujh ko

jahān-e-karb meñ be-intihā satātī haiñ

ki kis tarah tire lutf-o-karam kī mahrūmī

mire vujūd kī tārīkiyāñ baḌhātī hai

phir is ke baa'd ye mumkin hai tū taras khā kar

phir ek baar kare vā’da-e-vafā mujh se

vafā jo rahm-o-karam kī bisāt par kī jaa.e

mire zamīr kā dam toḌne ko kaafī hai

kisī saḳhī kī saḳhāvat kā maiñ nahīñ muhtāj

mujhe faqat kisī dildār kī zarūrat hai

isī liye to maiñ tujh ko sadā nahīñ detā

ki mujh ko rahm nahīñ pyaar kī zarūrat hai

kabhi kabhi jo teri yaad aane lagti hai

to sochta hun ki phir se sadaen dun tujh ko

is aas mein ki meri muztarib sada sun kar

tu ek bar palaT kar ke dekh le jaanan

ki kis tarah tere gham ke 'azab ka mara

teri nazar ke liye raat-din taDapta hai

ki kis tarah teri banhon ki duriyan mujh ko

jahan-e-karb mein be-intiha satati hain

ki kis tarah tere lutf-o-karam ki mahrumi

mere wujud ki tarikiyan baDhati hai

phir is ke ba'd ye mumkin hai tu taras kha kar

phir ek bar kare wa’da-e-wafa mujh se

wafa jo rahm-o-karam ki bisat par ki jae

mere zamir ka dam toDne ko kafi hai

kisi saKHi ki saKHawat ka main nahin muhtaj

mujhe faqat kisi dildar ki zarurat hai

isi liye to main tujh ko sada nahin deta

ki mujh ko rahm nahin pyar ki zarurat hai