ایک تصویر

راہ الفت کی روایات کہن زندہ ہیں

سر بکف اہل وفا بہر تماشا گزرے

درد کی رات وہی کرب کا احساس وہی

آمد صبح تمنا کا گماں کیا گزرے

خوف کلیوں کا تبسم بھی چرا لیتا ہے

افق جبر اندھیروں کا پتا دیتا ہے

ایک تصویر جو آویزاں تھی ایوانوں میں

خون کا غازہ ملے حسن ستم ہو جیسے

پیکر تمکنت و ناز و غرور باطل

در زنداں پہ تشدد کا علم ہو جیسے

اب وہ تصویر کسی گوشۂ ایواں میں نہیں

ذکر اس بت کا کسی بزم شبستاں میں نہیں

اس سے پہلے بھی کئی بار ہوا ہے ایسا

پھر بھی ارباب ہوس زہر ہوس پیتے ہیں

آدمیت کا تقدس ہے پشیماں ان سے

دست تعزیر سے زخموں کے دہن سیتے ہیں

وقت کا سلسلۂ شام و سحر یاد نہیں

ان کو تاریخ کا انداز سفر یاد نہیں