faisla

mirī ham-raqs koī dūsrā sāthī chun le

ye nahīñ hai ki mujhe tujh se mohabbat hī nahīñ

tū mirī 'umr kī kāvish kā sila hai lekin

tire ehsās alag haiñ mire afkār alag

tirā andāz judā hai mirī raftār alag

tujhe maazī kī rivāyāt se nisbat Thahrī

mujhe yak-rangī-e-hālāt se nafrat Thahrī

dard-e-paiham kī javāñ raat kahāñ tak dogī

husn-e-dilkash kī 'ināyāt kahāñ tak dogī

ye hasīñ jism mire vāste sab kuchh to nahīñ

'āriz-o-lab ke ḳharābāt kahāñ tak dogī

paañv kamzor haiñ tum saath kahāñ tak dogī

na sahī merī magar ahl-e-nazar kī sun le

mirī ham-raqs koī dūsrā sāthī chun le

meri ham-raqs koi dusra sathi chun le

ye nahin hai ki mujhe tujh se mohabbat hi nahin

tu meri 'umr ki kawish ka sila hai lekin

tere ehsas alag hain mere afkar alag

tera andaz juda hai meri raftar alag

tujhe mazi ki riwayat se nisbat Thahri

mujhe yak-rangi-e-haalat se nafrat Thahri

dard-e-paiham ki jawan raat kahan tak dogi

husn-e-dilkash ki 'inayat kahan tak dogi

ye hasin jism mere waste sab kuchh to nahin

'ariz-o-lab ke KHarabaat kahan tak dogi

panw kamzor hain tum sath kahan tak dogi

na sahi meri magar ahl-e-nazar ki sun le

meri ham-raqs koi dusra sathi chun le