فیصلہ

مری ہم رقص کوئی دوسرا ساتھی چن لے

یہ نہیں ہے کہ مجھے تجھ سے محبت ہی نہیں

تو مری عمر کی کاوش کا صلہ ہے لیکن

ترے احساس الگ ہیں مرے افکار الگ

ترا انداز جدا ہے مری رفتار الگ

تجھے ماضی کی روایات سے نسبت ٹھہری

مجھے یک رنگئ حالات سے نفرت ٹھہری

درد پیہم کی جواں رات کہاں تک دو گی

حسن دل کش کی عنایات کہاں تک دو گی

یہ حسیں جسم مرے واسطے سب کچھ تو نہیں

عارض و لب کے خرابات کہاں تک دو گی

پاؤں کمزور ہیں تم ساتھ کہاں تک دو گی

نہ سہی میری مگر اہل نظر کی سن لے

مری ہم رقص کوئی دوسرا ساتھی چن لے