faiz-e-shab

jagmagāte hue betāb sitāre mujh ko

de rahe haiñ tirī mā'sūm nigāhoñ kā payām

shiddat-e-tishna-labī auj pe aa.ī huī hai

raqs karte haiñ nigāhoñ meñ tire pyaar ke jaam

'arz kartā huuñ ba-sad 'ijz-o-adab jān-e-jahāñ

dāman-e-gul meñ par-afshāñ tirī ḳhushbū ko salām

kyā yahī husn-e-mohabbat hai ki har samt mujhe

harf-dar-harf nazar aane lagā hai tirā naam

haa.e vo shoḳh tabī'at vo mizāj-e-barham

haa.e vo tezī-e-guftār vo andāz-e-ḳhirām

haa.e vo sho'le uThātī huī ruḳhsār kī aañch

haa.e vo kaaT dikhātī huī nazroñ kī husām

ek muddat se tirī yaad nahīñ aa.ī thī

faiz-e-shab hai ki huā huuñ tirī yādoñ kā ġhulām

par kahāñ tak ye ġhulāmī kā bharam jā.egā

shab jo guzregī to ye faiz bhī tham jā.egā

jagmagate hue betab sitare mujh ko

de rahe hain teri ma'sum nigahon ka payam

shiddat-e-tishna-labi auj pe aai hui hai

raqs karte hain nigahon mein tere pyar ke jam

'arz karta hun ba-sad 'ijz-o-adab jaan-e-jahan

daman-e-gul mein par-afshan teri KHushbu ko salam

kya yahi husn-e-mohabbat hai ki har samt mujhe

harf-dar-harf nazar aane laga hai tera nam

hae wo shoKH tabi'at wo mizaj-e-barham

hae wo tezi-e-guftar wo andaz-e-KHiram

hae wo sho'le uThati hui ruKHsar ki aanch

hae wo kaT dikhati hui nazron ki husam

ek muddat se teri yaad nahin aai thi

faiz-e-shab hai ki hua hun teri yaadon ka ghulam

par kahan tak ye ghulami ka bharam jaega

shab jo guzregi to ye faiz bhi tham jaega