farar

maiñ ki bachpan meñ ek din ghar se

aisā bhāgā ki bhāgtā hī rahā

shahr-dar-shahr be-gharī kā 'azāb

āsmāñ mere naam likhtā rahā

merī ḳhāna-badoshiyāñ mujh se

kah rahī haiñ ki Thahr jā.ūñ kahīñ

aur kuchh thak chukā huuñ ab maiñ bhī

chāhtā huuñ ki ek shab ke liye

Thahr kar rāste meñ dam le luuñ

is se pahle ki ḳhema nasb karūñ

chand saa.e mire ta'āqub meñ

duur hī se dikhā.ī dete haiñ

aur phir bhārī-bhārī qadmoñ kī

chaap kānoñ meñ paḌne lagtī hai

fāsla bhī simaTne lagtā hai

aur maiñ phir se pāgaloñ kī tarah

ek jānib ko dauḌ paḌtā huuñ

aur phir sab Darāvne saa.e

dhund ke pīchhe Duub jaate haiñ

maiñ ki is baar bhī sadā kī tarah

un ke chungal se bach nikaltā huuñ

bach nikalnā bhī ik 'azāb sā hai

silsila ḳhatm kyoñ nahīñ hotā

ek jā-e-amān kī ḳhātir

kab talak bhāgtā rahūñgā maiñ

main ki bachpan mein ek din ghar se

aisa bhaga ki bhagta hi raha

shahr-dar-shahr be-ghari ka 'azab

aasman mere nam likhta raha

meri KHana-badoshiyan mujh se

kah rahi hain ki Thahr jaun kahin

aur kuchh thak chuka hun ab main bhi

chahta hun ki ek shab ke liye

Thahr kar raste mein dam le lun

is se pahle ki KHema nasb karun

chand sae mere ta'aqub mein

dur hi se dikhai dete hain

aur phir bhaari-bhaari qadmon ki

chap kanon mein paDne lagti hai

fasla bhi simaTne lagta hai

aur main phir se pagalon ki tarah

ek jaanib ko dauD paDta hun

aur phir sab Darawne sae

dhund ke pichhe Dub jate hain

main ki is bar bhi sada ki tarah

un ke chungal se bach nikalta hun

bach nikalna bhi ek 'azab sa hai

silsila KHatm kyon nahin hota

ek ja-e-aman ki KHatir

kab talak bhagta rahunga main