fard-e-jurm

shaam kā vaqt thā

tū ne jab mere hāthoñ se apnī hathelī

ye kah kar chhuḌā lī ki chhoḌo koī dekh legā

mujh ko hargiz ḳhabar hī nahīñ thī

ki koī kā matlab ḳhudā thā

jo hameñ roz milte hue dekhtā thā

aur ab tū nahīñ

maiñ hī maiñ huuñ yahāñ

aaj solah mahīne guzar ne ko aa.e

tujh ko dekhā nahīñ

tujh ko kyā hī pata mere nuqsān kā

ḳhair achchhā huā

lekin itnī tamanna maiñ siine meñ le kar phirā huuñ

ki ik roz maiñ is himāle kī choTī pe chaḌh kar

ḳhudā se kahūñgā

mirā jurm kyā thā

mirā jurm kyā thā

sham ka waqt tha

tu ne jab mere hathon se apni hatheli

ye kah kar chhuDa li ki chhoDo koi dekh lega

mujh ko hargiz KHabar hi nahin thi

ki koi ka matlab KHuda tha

jo hamein roz milte hue dekhta tha

aur ab tu nahin

main hi main hun yahan

aaj solah mahine guzar ne ko aae

tujh ko dekha nahin

tujh ko kya hi pata mere nuqsan ka

KHair achchha hua

lekin itni tamanna main sine mein le kar phira hun

ki ek roz main is himale ki choTi pe chaDh kar

KHuda se kahunga

mera jurm kya tha

mera jurm kya tha