fasana-e-adam

maiñ thā zamīr-e-mashiyyat meñ ek azm-e-jalīl

hanūz shauq kī karvaT bhī lī na thī maiñ ne

ki daf.atan mut.harrik hue lab-e-taḳhlīq

pakaḌ lī sūrat-e-zāhir vajūd kī maiñ ne

vo sub.h-e-ālam-e-hairat vo jalva-zār-e-bahisht

havā chaman kī lagī aañkh khol dī maiñ ne

vo tarbiyat-gah-zauq-e-nazar, vo vādī-e-nūr

jahāñ se paa.ī mohabbat kī raushnī maiñ ne

vo unfuvān-e-tamannā vo ibtidā-e-junūn

vo ik ḳhalish jise samjhā thā zindagī maiñ ne

kiyā surūr ne ik ālam-e-digar paidā

churā ke pī jo mai-e-sarkash-e-ḳhudiī maiñ ne

ḳhudī ke nashshe meñ allāh re be-ḳhudī merī

badan se chādar-e-ismat bhī pheñk dī maiñ ne

huā hudūd-e-nazar se nikal ke āvāra

havā-e-shauq meñ jannat bhī chhoḌ dī maiñ ne

farishte rah ga.e hairat se dekhte mujh ko

na kī qubūl mashiyyat kī rahbarī maiñ ne

dalīl-e-rāh banī apnī garmī-e-parvāz

ki tāqat-e-par-e-jibrīl chhīn lī maiñ ne

baḌhīñ sitāroñ kī duniyā.eñ mere lene ko

utar ke arsh se nīche nazar jo kī maiñ ne

magar zamīñ kī kashish ne sū-e-zamīñ khīñchā

kiyā pasand ye zindān-e-unsurī maiñ ne

jagah milī jo taḌapne kī be-qarārī ko

to phir hudūd meñ vus.at kī daad dī maiñ ne

huā talātum-e-hastī ba-ālam-e-zarrāt

chhiḌak dī ḳhāk-e-bayābāñ pe zindagī maiñ ne

numū ke josh se saudā-e-rañg-o-bū niklā

zamīñ ke dil kī tamannā nikāl dī maiñ ne

huiiñ jahān-e-amal meñ sharī.ateñ paidā

ḳhudā ke naam pe barpā jo kī ḳhudī maiñ ne

kabhī jalā.ī añdhere meñ sham.a-e-ilm-o-amal

kabhī bujhā dī hidāyat kī raushnī maiñ ne

kabhī bigāḌ ke rakh diiñ savāb kī shakleñ

kabhī badal dī haqīqat gunāh kī maiñ ne

baḌhā to rah gayā pīchhe mire zamāna-e-hāl

rukā to vaqt kī rafta rok dī maiñ ne

zamīñ pe shauq ke fitne bichhā diye har sū

fazā meñ niiñd kī mastī bikher dī maiñ ne

kabhī jagā dī qayāmat nafas kī Thokar se

uThā ke sūr-e-sarāfīl-e-zindagī maiñ ne

junūñ ke josh meñ parde nazar ke chaak kiye

naqāb noch ke fitrat kī pheñk dī maiñ ne

qabā-e-laila-e-tahzīb chaak kar Daalī

ridā-e-maryam-e-ismat utaar lī maiñ ne

mizāj-e-ātish-e-sozāñ ko kar diyā ThanDā

machā dī bazm-e-anāsir meñ khalbalī maiñ ne

liyā shahanshah-e-ḳhāvar se raushnī kā ḳhirāj

kiyā asiir tabī.at ko barq kī maiñ ne

ba-inqalāb-e-tabī.at mizāj-e-āhan ko

havā kī garmī-e-parvāz baḳhsh dī maiñ ne

bulandiyoñ kā tasavvur bhī rah gayā pīchhe

pahuñch ke itnī bulandī pe saañs lī maiñ ne

ThiThuk ga.iiñ jo nigāheñ qarīb hujla-e-quds

pas-e-hijāb-e-adab ye sadā sunī maiñ ne

ki ai harīf-e-mashiyyat ba-va.ada-gāh-e-azal

Thahar Thahar tirī parvāz dekh lī maiñ ne

main tha zamir-e-mashiyyat mein ek azm-e-jalil

hanuz shauq ki karwaT bhi li na thi main ne

ki dafatan mutharrik hue lab-e-taKHliq

pakaD li surat-e-zahir wajud ki main ne

wo subh-e-alam-e-hairat wo jalwa-zar-e-bahisht

hawa chaman ki lagi aankh khol di main ne

wo tarbiyat-gah-zauq-e-nazar, wo wadi-e-nur

jahan se pai mohabbat ki raushni main ne

wo unfuwan-e-tamanna wo ibtida-e-junun

wo ek KHalish jise samjha tha zindagi main ne

kiya surur ne ek aalam-e-digar paida

chura ke pi jo mai-e-sarkash-e-KHudii main ne

KHudi ke nashshe mein allah re be-KHudi meri

badan se chadar-e-ismat bhi phenk di main ne

hua hudud-e-nazar se nikal ke aawara

hawa-e-shauq mein jannat bhi chhoD di main ne

farishte rah gae hairat se dekhte mujh ko

na ki qubul mashiyyat ki rahbari main ne

dalil-e-rah bani apni garmi-e-parwaz

ki taqat-e-par-e-jibril chhin li main ne

baDhin sitaron ki duniyaen mere lene ko

utar ke arsh se niche nazar jo ki main ne

magar zamin ki kashish ne su-e-zamin khincha

kiya pasand ye zindan-e-unsuri main ne

jagah mili jo taDapne ki be-qarari ko

to phir hudud mein wusat ki dad di main ne

hua talatum-e-hasti ba-alam-e-zarraat

chhiDak di KHak-e-bayaban pe zindagi main ne

numu ke josh se sauda-e-rang-o-bu nikla

zamin ke dil ki tamanna nikal di main ne

huin jahan-e-amal mein shariaten paida

KHuda ke nam pe barpa jo ki KHudi main ne

kabhi jalai andhere mein shama-e-ilm-o-amal

kabhi bujha di hidayat ki raushni main ne

kabhi bigaD ke rakh din sawab ki shaklen

kabhi badal di haqiqat gunah ki main ne

baDha to rah gaya pichhe mere zamana-e-haal

ruka to waqt ki rafta rok di main ne

zamin pe shauq ke fitne bichha diye har su

faza mein nind ki masti bikher di main ne

kabhi jaga di qayamat nafas ki Thokar se

uTha ke sur-e-sarafil-e-zindagi main ne

junun ke josh mein parde nazar ke chaak kiye

naqab noch ke fitrat ki phenk di main ne

qaba-e-laila-e-tahzib chaak kar Dali

rida-e-maryam-e-ismat utar li main ne

mizaj-e-atish-e-sozan ko kar diya ThanDa

macha di bazm-e-anasir mein khalbali main ne

liya shahanshah-e-KHawar se raushni ka KHiraj

kiya asir tabiat ko barq ki main ne

ba-inqalab-e-tabiat mizaj-e-ahan ko

hawa ki garmi-e-parwaz baKHsh di main ne

bulandiyon ka tasawwur bhi rah gaya pichhe

pahunch ke itni bulandi pe sans li main ne

ThiThuk gain jo nigahen qarib hujla-e-quds

pas-e-hijab-e-adab ye sada suni main ne

ki ai harif-e-mashiyyat ba-wada-gah-e-azal

Thahar Thahar teri parwaz dekh li main ne