front-page

hazāroñ saal se aurat

hiqārat gāliyāñ aur Thokareñ sahtī rahī hai

hazāroñ saal se har saañs par martī rahī hai

ab bhī har ghar meñ

ye zinda dafn hotī hai

magar is meñ ḳhabar kī baat hī koī nahīñ hai

tumhārī jāmia punjab kī haḌtāl kā ye chauthā hafta hai

zamīn-dāroñ ne phir kuchh auratoñ ko

gaañv meñ bandūq par nangā nachāyā hai

unheñ galiyoñ mohalloñ meñ phirāyā hai

kahīñ lahore meñ bā-rīsh laḌkoñ ne

professor ko piiTā hai

ye ḳhabreñ apnī byte kho chukī haiñ

purānī aur farsūda kahānī ho chukī haiñ

unheñ andar kahīñ par ek column tiin line kī jagah de do

javāñ aurat kī galtī laash

kuuḌe se milī hai

us ko thoḌā chaT-paTā kar do

likho sattrah baras kī gandumī laḌkī

jise insān ne nochā

jise kuttoñ ne khāyā

aur police ne qabr meñ Daalā

ḳhabar ye ban ga.ī hai

is ḳhabar ko pāñch column chaukhaTe meñ Daal kar chhāpo

aur is ke saath saḌtī laash kī

tasvīr bhī de do

ka.ī din se karachi ḳhuun kī holī nahīñ khelā

bahut aḳhbār phīkā hai

kahīñ se koī dahshat-gard Daaku aur qātil

DhūñD kar laao

kahīñ ho ḳhauf kā chaskā

kahīñ koī scandal ho

kahīñ par jins kī tazlīl hotī ho

kahīñ par masḳh lāshe hoñ

kahīñ par ḳhuun kī bū ho

hukūmat agle hafte hī girā deñge

bayāñ hizb-e-muḳhālif kā hai

ye shah-surḳhī lagā do ya.anī peshānī sajā do

hukūmat chor hai ḳhā.in hai

saarā mulk tanhā khā rahī hai kitne barsoñ se

vo saare khel meñ

ab ham ko baarī de

ki ham bhī to karoḌoñ ḳharch kar ke hī numā.inde bane the

ham kahāñ jaa.eñ

bahut mazbūt hai apnī hukūmat

hil nahīñ saktī

abhī se tum ko kursī mil nahīñ saktī

use bhī saath utnī hī jagah de do

kisī ne aaj phir masjid pe bam pheñkā

namāzī ḳhuun meñ ġhaltāñ

scope achchhā hai

ye puurā quarter page le legā

kisī mazdūr par chhat aa girī hai

aur kisī ne ḳhud-kushī kī hai

kisī VIP ne chhīñk maarī hai

ye sah column

vo do column

yahāñ par cartōn aa jā.egā

aur laash us kone meñ fiT hogī

ye baaqī ishtihāroñ kī jagah maḳhsūs rakkhī hai

mubārakbād hai aur Sale hai

aur ek tender hai

ḳhushī kā raaz hai

barqī clinic hai

chalo sab paste up kar do

mujhe ab dūsrā saf.ha dikhā do

hazaron sal se aurat

hiqarat galiyan aur Thokaren sahti rahi hai

hazaron sal se har sans par marti rahi hai

ab bhi har ghar mein

ye zinda dafn hoti hai

magar is mein KHabar ki baat hi koi nahin hai

tumhaari jamia punjab ki haDtal ka ye chautha hafta hai

zamin-daron ne phir kuchh auraton ko

ganw mein banduq par nanga nachaya hai

unhen galiyon mohallon mein phiraya hai

kahin lahore mein ba-rish laDkon ne

professor ko piTa hai

ye KHabren apni byte kho chuki hain

purani aur farsuda kahani ho chuki hain

unhen andar kahin par ek column tin line ki jagah de do

jawan aurat ki galti lash

kuDe se mili hai

us ko thoDa chaT-paTa kar do

likho sattrah baras ki gandumi laDki

jise insan ne nocha

jise kutton ne khaya

aur police ne qabr mein Dala

KHabar ye ban gai hai

is KHabar ko panch column chaukhaTe mein Dal kar chhapo

aur is ke sath saDti lash ki

taswir bhi de do

kai din se karachi KHun ki holi nahin khela

bahut aKHbar phika hai

kahin se koi dahshat-gard Daku aur qatil

DhunD kar lao

kahin ho KHauf ka chaska

kahin koi scandal ho

kahin par jins ki tazlil hoti ho

kahin par masKH lashe hon

kahin par KHun ki bu ho

hukumat agle hafte hi gira denge

bayan hizb-e-muKHalif ka hai

ye shah-surKHi laga do yani peshani saja do

hukumat chor hai KHain hai

sara mulk tanha kha rahi hai kitne barson se

wo sare khel mein

ab hum ko bari de

ki hum bhi to karoDon KHarch kar ke hi numainde bane the

hum kahan jaen

bahut mazbut hai apni hukumat

hil nahin sakti

abhi se tum ko kursi mil nahin sakti

use bhi sath utni hi jagah de do

kisi ne aaj phir masjid pe bam phenka

namazi KHun mein ghaltan

scope achchha hai

ye pura quarter page le lega

kisi mazdur par chhat aa giri hai

aur kisi ne KHud-kushi ki hai

kisi VIP ne chhink mari hai

ye sah column

wo do column

yahan par cartoon aa jaega

aur lash us kone mein fiT hogi

ye baqi ishtihaaron ki jagah maKHsus rakkhi hai

mubarakbaad hai aur Sale hai

aur ek tender hai

KHushi ka raaz hai

barqi clinic hai

chalo sab paste up kar do

mujhe ab dusra safha dikha do