ghaalib ki ghazal

ik musavvir kā hasīñ ḳhvāb hai 'ġhālib' kī ġhazal

ik daraḳhshāñ shab-e-mahtāb hai 'ġhālib' kī ġhazal

jhanjhanā uThte haiñ jis se dil-e-betāb ke taar

sāz-e-hastī kā vo mizrāb hai 'ġhālib' kī ġhazal

shabnam-e-nok-e-mizha ne bhī ye mahsūs kiyā

har ġhazal gauhar-e-nāyāb hai 'ġhālib' kī ġhazal

ik parastār-e-adab ke liye ai sajda-e-shauq

masjid-o-mimbar-o-mehrāb hai 'ġhālib' kī ġhazal

bāda-noshān-e-adab ke liye ai sāqī-e-fan

sāġhar-e-jam hai mai-e-nāb hai 'ġhālib' kī ġhazal

husn kī aañkh meñ sahme hue aañsū kī tarah

sīna-e-'ishq meñ be-tāb hai 'ġhālib' kī ġhazal

dām-e-har-mauj-e-taḳhayyul meñ hai kashtī kī tarah

aur tūfān hai girdāb hai 'ġhālib' kī ġhazal

'hāfiz'-o-'rūmī'-o-'bedil' kī hai dil kī dhaḌkan

husn-e-taḳh.īl kā ik baab hai 'ġhālib' kī ġhazal

nik.hat-o-rang meñ Duubā huā har misra'-e-tar

kitnī sarsabz hai shādāb hai 'ġhālib' kī ġhazal

ḳhusrav-e-fikr o shahanshāh-e-taḳhayyul kahiye

phir bhī minnat-kash-e-alqāb hai 'ġhālib' kī ġhazal

raqs kartī hai zamāne kī rag-o-pai meñ 'adīb'

rū-kash-e-barq hai sīmāb hai 'ġhālib' kī ġhazal

ek musawwir ka hasin KHwab hai 'ghaalib' ki ghazal

ek daraKHshan shab-e-mahtab hai 'ghaalib' ki ghazal

jhanjhana uThte hain jis se dil-e-betab ke tar

saz-e-hasti ka wo mizrab hai 'ghaalib' ki ghazal

shabnam-e-nok-e-mizha ne bhi ye mahsus kiya

har ghazal gauhar-e-nayab hai 'ghaalib' ki ghazal

ek parastar-e-adab ke liye ai sajda-e-shauq

masjid-o-mimbar-o-mehrab hai 'ghaalib' ki ghazal

baada-noshan-e-adab ke liye ai saqi-e-fan

saghar-e-jam hai mai-e-nab hai 'ghaalib' ki ghazal

husn ki aankh mein sahme hue aansu ki tarah

sina-e-'ishq mein be-tab hai 'ghaalib' ki ghazal

dam-e-har-mauj-e-taKHayyul mein hai kashti ki tarah

aur tufan hai girdab hai 'ghaalib' ki ghazal

'hafiz'-o-'rumi'-o-'bedil' ki hai dil ki dhaDkan

husn-e-taKHil ka ek bab hai 'ghaalib' ki ghazal

nikhat-o-rang mein Duba hua har misra'-e-tar

kitni sarsabz hai shadab hai 'ghaalib' ki ghazal

KHusraw-e-fikr o shahanshah-e-taKHayyul kahiye

phir bhi minnat-kash-e-alqab hai 'ghaalib' ki ghazal

raqs karti hai zamane ki rag-o-pai mein 'adib'

ru-kash-e-barq hai simab hai 'ghaalib' ki ghazal