غازہ

لہو آج پھر بہہ رہا ہے

زمیں تو زمیں آسماں سرخ ہے

دیار اشوکا میں پھر رقص ابلیس کا ہے

چمن زار گوتم میں ہیں چاک در چاک کلیاں

زباں میرؔ و غالبؔ کی اب کشتنی ہے

نگار وطن در پہ جمہور کے سرنگوں ہے

مگر اے شہیدان اردو

تمہارا لہو

چراغ سر رہ گزر ہے

متاع گراں بحر فکر و نظر ہے

پیام طلوع سحر ہے

تمہارے لہو سے

لب وقت پر آ گیا ہے تبسم

عنادل نے پایا ہے ذوق ترنم

زبان خموشی نے سیکھی ہے طرز تکلم

یقیں ہے

لہو یہ تمہارا

رخ میرؔ و غالبؔ کا غازہ بنے گا

جبین وطن پر

یہ چمکے گا سیندور بن کر