ghair-mutawaqqa mulaqat

barsoñ ba.ad jab us ko dekhā phuul sā chehra badal chukā thā

peshānī par fikr kī aayat āñkheñ ab sanjīda thiiñ

hoñT kañval ab bhī vaise par shādābī kuchh kam kam thī

pakke phaloñ kā bojh uThā.e jism tanā bal khātā thā

rañgīñ pairāhan meñ ab bhī

ḳhvāb kī sūrat lagtī thī

jaane kaisī kaisī hikāyat dekh use yaad aatī thī

pahlī daf.a jab saath the baiThe class ke andar ham donoñ

us ke jism ke lams ne mujh ko

pahle to bulāyā thā phir pakkā dost banāyā thā

shaam talak mele meñ kaise phirte rahe the idhar-udhar

raat ga.e mammy ne us ko khoTī-kharī sunā.ī thī

rail ke andar baiTh ke kaise sharmā.e ghabrā.e the

baġhair ticket ke pahuñch ke ghar par kitnī mauj manā.ī thī

dopahar ko Dhābe meñ

chaa.e aur cigarette ke saath

thoḌe se rūmānī ho kar

kyā kyā bāteñ karte the

ghar ke bāhar lawn bhī hogā geñdā aur gul-mohar ke phuul

kharī khaaT nahīñ rakheñge bed baḌe mahñge hoñge

suiT mirā aisā hogā terī saarī resham kī

beTe kā jo naam rakheñge hindū na muslim hogā

bil chukāte vaqt meñ aksar paise kam paḌ jaate the

dekh ke daddū hañstā thā phir

jaane kyuuñ ḳhush hotā thā

koī baat nahīñ hai beTe

kal jab aao de jaanā

jaate hue jab seTh ne us kī kamar meñ baazū pahnāyā

dekh ke us kī āñkheñ mujh ko chhalak paḌī thiiñ chup ke se

soch rahā thā palaT ke ab vo

pūchhegī tum kaise ho

ye hai aap kī coffē sāhab aur bhī kuchh chahiye hogā

barson baad jab us ko dekha phul sa chehra badal chuka tha

peshani par fikr ki aayat aankhen ab sanjida thin

honT kanwal ab bhi waise par shadabi kuchh kam kam thi

pakke phalon ka bojh uThae jism tana bal khata tha

rangin pairahan mein ab bhi

KHwab ki surat lagti thi

jaane kaisi kaisi hikayat dekh use yaad aati thi

pahli dafa jab sath the baiThe class ke andar hum donon

us ke jism ke lams ne mujh ko

pahle to bulaya tha phir pakka dost banaya tha

sham talak mele mein kaise phirte rahe the idhar-udhar

raat gae mammy ne us ko khoTi-khari sunai thi

rail ke andar baiTh ke kaise sharmae ghabrae the

baghair ticket ke pahunch ke ghar par kitni mauj manai thi

dopahar ko Dhabe mein

chae aur cigarette ke sath

thoDe se rumani ho kar

kya kya baaten karte the

ghar ke bahar lawn bhi hoga genda aur gul-mohar ke phul

khari khaT nahin rakhenge bed baDe mahnge honge

suiT mera aisa hoga teri sari resham ki

beTe ka jo nam rakhenge hindu na muslim hoga

bil chukate waqt mein aksar paise kam paD jate the

dekh ke daddu hansta tha phir

jaane kyun KHush hota tha

koi baat nahin hai beTe

kal jab aao de jaana

jate hue jab seTh ne us ki kamar mein bazu pahnaya

dekh ke us ki aankhen mujh ko chhalak paDi thin chup ke se

soch raha tha palaT ke ab wo

puchhegi tum kaise ho

ye hai aap ki coffee sahab aur bhi kuchh chahiye hoga