gham-e-faiz

mahfil-e-she'r-o-suḳhan dosto be-faiz huī

gul karo sham'eñ charāġhoñ kī laveñ zaḳhmī karo

ret bāloñ meñ bharo

chaak garebāñ kar lo

raat Dhalne lagī

tāroñ ke badan dikhne lage

sub.h kī āñkhoñ se risne lagā

sūraj kā lahū

āhaTeñ kho ga.iiñ

dhuñdlā ga.e qadmoñ ke nishāñ

ajnabī ḳhaak meñ gum ho gayā tāroñ kā jahāñ

aa ke manzil pe bahakne lage rahrau ke qadam

laḌkhaḌāne lage ummīdoñ ke ḳhvābīda sanam

rāste so ga.e mahrūmiyāñ āñkhoñ meñ liye

TimTimāne lage hoñToñ pe du'āoñ ke diye

bujh gayā aaj vahī she'r-o-suḳhan kā mahtāb

tīsrī duniyā meñ thī raushnī jis ke dam se

jis ne baḳhshe the ġharīboñ ko

na.e 'azm na.e hausle jiine ke liye

jis ne mehnat-kashoñ mazdūroñ ke ġham ko samjhā

jis ne kuchle hue insānoñ ke dukh ko jaanā

jis ne insāñ kī baqā ke liye

jeleñ kāTīñ

jis ne āvāz uThā.ī thī tashaddud ke ḳhilāf

jis ne iz.hār kiyā amn kā sachchā.ī kā

jis ne paiġhām diyā husn kā insāf kā

rā'nā.ī kā

jis ke ash'ār meñ thī fikr-o-‘amal kī talqīn

jis ke ash'ār meñ thī shiddat-e-ehsās-e-jamāl

jis ke kirdār meñ āfāqiyat

aur lahje meñ

rijā.iyat thī

jis ke hoñToñ pe mohabbat ke tarāne gūñje

jis ke ash'ār meñ muflis ke fasāne gūñje

haif-sad-haif vo shā'ir-o-mufakkir na rahā

aaj bairūt ke mazlūmoñ kā zākir na rahā

dosto aao chalo suunī huī bazm-e-suḳhan

'umr bhar ek yahī ġham hameñ taḌpā.egā

apne be-ḳhvāb kivāḌoñ ko muqaffal kar lo

ab yahāñ koī nahīñ koī aa.e aa.egā

mahfil-e-she'r-o-suKHan dosto be-faiz hui

gul karo sham'en charaghon ki lawen zaKHmi karo

ret baalon mein bharo

chaak gareban kar lo

raat Dhalne lagi

taron ke badan dikhne lage

subh ki aankhon se risne laga

suraj ka lahu

aahaTen kho gain

dhundla gae qadmon ke nishan

ajnabi KHak mein gum ho gaya taron ka jahan

aa ke manzil pe bahakne lage rahrau ke qadam

laDkhaDane lage ummidon ke KHwabida sanam

raste so gae mahrumiyan aankhon mein liye

TimTimane lage honTon pe du'aon ke diye

bujh gaya aaj wahi she'r-o-suKHan ka mahtab

tisri duniya mein thi raushni jis ke dam se

jis ne baKHshe the gharibon ko

nae 'azm nae hausle jine ke liye

jis ne mehnat-kashon mazduron ke gham ko samjha

jis ne kuchle hue insanon ke dukh ko jaana

jis ne insan ki baqa ke liye

jelen kaTin

jis ne aawaz uThai thi tashaddud ke KHilaf

jis ne izhaar kiya amn ka sachchai ka

jis ne paigham diya husn ka insaf ka

ra'nai ka

jis ke ash'ar mein thi fikr-o-‘amal ki talqin

jis ke ash'ar mein thi shiddat-e-ehsas-e-jamal

jis ke kirdar mein aafaqiyat

aur lahje mein

rijaiyat thi

jis ke honTon pe mohabbat ke tarane gunje

jis ke ash'ar mein muflis ke fasane gunje

haif-sad-haif wo sha'ir-o-mufakkir na raha

aaj bairut ke mazlumon ka zakir na raha

dosto aao chalo suni hui bazm-e-suKHan

'umr bhar ek yahi gham hamein taDpaega

apne be-KHwab kiwaDon ko muqaffal kar lo

ab yahan koi nahin koi aae aaega