gharonda

har ek lamha ye sochtā huuñ

vo saare rishte tamām naate

bañdhe hue haiñ jo jism-e-zāhir kī tāzgī se

unheñ miTā duuñ

vo saare chehre likhe hoñ jo iztirāb-e-jāñ par

unheñ jalā duuñ

ki jism to ḳhaak kī sadā hai

rahegī ḳhāk-e-badan meñ jab tak numū kī quvvat

lahū ragoñ meñ ravāñ rahegā

zamīr-e-armāñ javāñ rahegā

ye fasl rishtoñ kī zehn-o-dil par ugī rahegī

rafāqatoñ kī ghaḌī nazar meñ khulī rahegī

khulī haiñ āñkheñ to āsmāñ kī bulandiyāñ haiñ

har ek manzar giraft-e-fikr-o-shu.ūr meñ hai

qadam zamīñ par thirak rahe haiñ

to phuul saare mahak rahe haiñ

agar na ho jism meñ harārat

to āñdhiyāñ zarra zarra us kā vajūd bhī leñ

tamām rishte tamām bandhan tamām naate

asaas Thahre jo roz-o-shab kī

har ek pahchān toḌ Dāleñ

vo saare me.aar jin ko dil ne vafā kahā hai

bikhar ke gumnām ho bhī sakte haiñ ek pal meñ

kahīñ kisī kā nishāñ na paa.eñ

zamīn par āsmāñ na paa.eñ

yaqīñ na paa.eñ gumāñ na paa.eñ

koī kisī par kahīñ bhī phir mehrbāñ na paa.eñ

maiñ in ḳhalāoñ meñ dil-shikasta

na jaane kis kī talāsh meñ huuñ

pas-e-hijāb-e-ġhubār meñ tīrgī ke saa.e

nazar jhukā.e badan churā.e

maiñ sirf itnā samajh sakā huuñ

jahāñ meñ koī nahīñ kisī kā

yahī ishāra hai āgahī kā

yahī hai anjām zindagī kā

magar samajh ke bhī nā-samajh huuñ

nadī kināre banā rahā huuñ

maiñ ret ke be-zabāñ gharauñde

sabhī ko rishtoñ meñ bāñdhne kī ajiib koshish

samajh rahā huuñ sabhī ko apnā

ajiib sī bhuul kar rahā huuñ

har ek lamha ye sochta hun

wo sare rishte tamam nate

bandhe hue hain jo jism-e-zahir ki tazgi se

unhen miTa dun

wo sare chehre likhe hon jo iztirab-e-jaan par

unhen jala dun

ki jism to KHak ki sada hai

rahegi KHak-e-badan mein jab tak numu ki quwwat

lahu ragon mein rawan rahega

zamir-e-arman jawan rahega

ye fasl rishton ki zehn-o-dil par ugi rahegi

rafaqaton ki ghaDi nazar mein khuli rahegi

khuli hain aankhen to aasman ki bulandiyan hain

har ek manzar giraft-e-fikr-o-shuur mein hai

qadam zamin par thirak rahe hain

to phul sare mahak rahe hain

agar na ho jism mein hararat

to aandhiyan zarra zarra us ka wajud bhi len

tamam rishte tamam bandhan tamam nate

asas Thahre jo roz-o-shab ki

har ek pahchan toD Dalen

wo sare mear jin ko dil ne wafa kaha hai

bikhar ke gumnam ho bhi sakte hain ek pal mein

kahin kisi ka nishan na paen

zamin par aasman na paen

yaqin na paen guman na paen

koi kisi par kahin bhi phir mehrban na paen

main in KHalaon mein dil-shikasta

na jaane kis ki talash mein hun

pas-e-hijab-e-ghubar mein tirgi ke sae

nazar jhukae badan churae

main sirf itna samajh saka hun

jahan mein koi nahin kisi ka

yahi ishaara hai aagahi ka

yahi hai anjam zindagi ka

magar samajh ke bhi na-samajh hun

nadi kinare bana raha hun

main ret ke be-zaban gharaunde

sabhi ko rishton mein bandhne ki ajib koshish

samajh raha hun sabhi ko apna

ajib si bhul kar raha hun