guDDe miyan ki shadi

guDDe miyāñ kī shādī

har ik samt gūñje hue qahqahe

hañsī dil-lagī zamzame chahchahe

zamīñ muskurā āsmāñ ḳhuub jhuum

ki baaqī nagar meñ hai shādī kī dhuum

yahāñ mehmāñ aur vahāñ mehmāñ

jidhar dekhiye aur jahāñ mehmāñ

ġharaz mehmāñ aa.e haiñ be-shumār

ki muddat se is din kā thā intizār

nausha banāne kī rasm

vo guDDe miyāñ ghar bulā.e ga.e

biThā kar vo nausha banā.e ga.e

hathelī pe mehñdī rachā.ī ga.ī

vo nausha ko achkan pahnā.ī ga.ī

vo gaañv kā maalī 'atīq' aa gayā

vo sarsoñ ke phūloñ kā sahrā bañdhā

har ik rasm se jab farāġhat huī

to mirchoñ ke phūloñ kī baddhī paḌī

vo ham-joliyoñ meñ lagā qahqaha

marāsan jo ban kar uThīñ 'hāshima'

marāsan bhī Dholak bajāne lagī

ḳhushī ke tarāne sunāne lagī

marāsan ko muñh māñgā haq jab milā

ba-mushkil marāsan se pīchhā chhuTā

bārāt kī ravāngī

vo nausha miyāñ pahne goTe kā haar

chale ek meñDhe pe ho kar savār

chhanā-chhan chhanā-chhan barātī chale

patīlī ke dhakne bajāte hue

vo 'annū' gavayyā bhī gaatā huā

fazāoñ meñ tāneñ uḌātā huā

na.ī zindagānī mubārak rahe

mubārak ye shādī mubārak rahe

bārāt dulhan ke makān pahuñch chukī ab nikāh kā vaqt hai

'qamar' haiñ vakīl aur 'aqīla' gavāh

'surayyā' kī guḌiyā kā dekho byaah

vo 'raziya' ko qaazī banāyā gayā

vo nausha ko mahfil meñ laayā gayā

vo qaazī varaq ik ulaTne lage

barātī sab ik jā simaTne lage

qaazī jī nikāh paḌhāte haiñ

musammāt-e-gul duḳhtar-e-shaiḳh 'ḳhār'

ba-mahr-e-muajjal bayāsī hazār

gulistāñ kā motī samundar kā phuul

kaho bhaa.ī guDDe ye shādī qubūl

chhohāroñ kī taqsīm

paḌhā kar uThe jaise qaazī nikāh

kisī ne chhohāroñ kī de dī salāh

chhohāroñ kī thālī luTā.ī ga.ī

shakar bhī maze le ke khaa.ī ga.ī

kisī ne chhohāroñ se Topī bharī

shakar bhī kahīñ ḳhuub phāñkī ga.ī

magar ek sāhab kamand-e-havā

kaheñ kis se apnā ajab mājrā

ye har chand bachpan ke hushiyār the

chhohāroñ kī luTTas pe tayyār the

magar bhiiḌ meñ aise kuchh ye dabe

ki har paañv ke nīche kuchle ga.e

paTā-paT chhohāre baraste rahe

magar ye bichāre taraste rahe

koī naak par koī sar par lagā

magar un ke muñh tak na koī gayā

shakar aañkh aur kaan meñ ghus ga.ī

bichāre kī puurī hī durgat banī

natīja ye sab jald-bāzī kā thā

ki in kā maza kirkirā ho gayā

dulhan kī ruḳhsatī

vo chhoTā sā ik box laayā gayā

miyāna jise thā banāyā gayā

savārī ye dulhan kī thī aa ga.ī

vo baiThī dulhan vo huī ruḳhsatī

kahār apne kāñdhe badalte chale

miyāne pe dūlhā kī dulhan liye

kuḌum-dhum kuḌum-dhum chalī phir barāt

lagī gūñjne gaane baaje se raat

anaar aur chhachhūñdar chhuTāte hue

nichhāvar ke paise luTāte hue

sahar hote hote makāñ aa ga.e

dulhan le ke guDDe miyāñ aa ga.e

bārāt vāpas aa kar

yahī mehmānoñ meñ hai guftugū

ki dūlhan hai be-shak baḌī ḳhūb-rū

salīqe ke sasurāl vaale bhī haiñ

dikhāvā nahīñ maal vaale bhī haiñ

ye sardī kī sub.h aur sardī kī shaam

magar qābil-e-dād har intizām

ye bartan ye kapḌe ye kursī ye mez

milā hai bahut ḳhūbsūrat jahez

sadā phir vo 'annū' kī aane lagī

fazāoñ meñ mastī luTāne lagī

na.ī zindagānī mubārak rahe

mubārak ye shādī mubārak rahe

guDDe miyan ki shadi

har ek samt gunje hue qahqahe

hansi dil-lagi zamzame chahchahe

zamin muskura aasman KHub jhum

ki baqi nagar mein hai shadi ki dhum

yahan mehman aur wahan mehman

jidhar dekhiye aur jahan mehman

gharaz mehman aae hain be-shumar

ki muddat se is din ka tha intizar

nausha banane ki rasm

wo guDDe miyan ghar bulae gae

biTha kar wo nausha banae gae

hatheli pe mehndi rachai gai

wo nausha ko achkan pahnai gai

wo ganw ka mali 'atiq' aa gaya

wo sarson ke phulon ka sahra bandha

har ek rasm se jab faraghat hui

to mirchon ke phulon ki baddhi paDi

wo ham-joliyon mein laga qahqaha

marasan jo ban kar uThin 'hashima'

marasan bhi Dholak bajaane lagi

KHushi ke tarane sunane lagi

marasan ko munh manga haq jab mila

ba-mushkil marasan se pichha chhuTa

baraat ki rawangi

wo nausha miyan pahne goTe ka haar

chale ek meinDhe pe ho kar sawar

chhana-chhan chhana-chhan baraati chale

patili ke dhakne bajate hue

wo 'annu' gawayya bhi gata hua

fazaon mein tanen uData hua

nai zindagani mubarak rahe

mubarak ye shadi mubarak rahe

baraat dulhan ke makan pahunch chuki ab nikah ka waqt hai

'qamar' hain wakil aur 'aqila' gawah

'surayya' ki guDiya ka dekho byah

wo 'raziya' ko qazi banaya gaya

wo nausha ko mahfil mein laya gaya

wo qazi waraq ek ulaTne lage

baraati sab ek ja simaTne lage

qazi ji nikah paDhate hain

musammat-e-gul duKHtar-e-shaiKH 'KHar'

ba-mahr-e-muajjal bayasi hazar

gulistan ka moti samundar ka phul

kaho bhai guDDe ye shadi qubul

chhohaaron ki taqsim

paDha kar uThe jaise qazi nikah

kisi ne chhohaaron ki de di salah

chhohaaron ki thaali luTai gai

shakar bhi maze le ke khai gai

kisi ne chhohaaron se Topi bhari

shakar bhi kahin KHub phanki gai

magar ek sahab kamand-e-hawa

kahen kis se apna ajab majra

ye har chand bachpan ke hushiyar the

chhohaaron ki luTTas pe tayyar the

magar bhiD mein aise kuchh ye dabe

ki har panw ke niche kuchle gae

paTa-paT chhohaare baraste rahe

magar ye bichaare taraste rahe

koi nak par koi sar par laga

magar un ke munh tak na koi gaya

shakar aankh aur kan mein ghus gai

bichaare ki puri hi durgat bani

natija ye sab jald-bazi ka tha

ki in ka maza kirkira ho gaya

dulhan ki ruKHsati

wo chhoTa sa ek box laya gaya

miyana jise tha banaya gaya

sawari ye dulhan ki thi aa gai

wo baiThi dulhan wo hui ruKHsati

kahaar apne kandhe badalte chale

miyane pe dulha ki dulhan liye

kuDum-dhum kuDum-dhum chali phir baraat

lagi gunjne gane baje se raat

anar aur chhachhundar chhuTate hue

nichhawar ke paise luTate hue

sahar hote hote makan aa gae

dulhan le ke guDDe miyan aa gae

baraat wapas aa kar

yahi mehmanon mein hai guftugu

ki dulhan hai be-shak baDi KHub-ru

saliqe ke sasural wale bhi hain

dikhawa nahin mal wale bhi hain

ye sardi ki subh aur sardi ki sham

magar qabil-e-dad har intizam

ye bartan ye kapDe ye kursi ye mez

mila hai bahut KHubsurat jahez

sada phir wo 'annu' ki aane lagi

fazaon mein masti luTane lagi

nai zindagani mubarak rahe

mubarak ye shadi mubarak rahe